फाइल फोटो
नेकपा एमाले अध्यक्ष केपी ओलीले देश विकासका खातिर आफूले परिकल्पना गरेका विकास निर्माणका योजनालाई व्यंग्यको विषयवस्तु बनाएको गुनासो गरेका छन्।
शुक्रबार काठमाडौंमा कलाकार बैकुण्ठ महतको ‘हाम्रो नेपाल हामी नेपाली’ गीतिसंग्रहको विमोचन गदै अध्यक्ष ओलीले आफूले सरकारको नेतृत्व गरेको बेलामा परिकल्पना गरिएका विकास निर्माणका योजनालाई मजाकमा उडाइएको बताए। उनले नेपालले पानी जहाज किन्ने हिम्मत राख्छ भनेर आफूले समृद्ध मुलुकको परिकल्पना गर्दा आलोचित बन्न पुगेको उल्लेख गरे। उनले विकास निर्माण र मुलुकको परिवर्तनका लागि आफूसँग देशभक्ति, आँट र हिम्मत भएपनि हाँसोको पात्र बनाइएको गुनासो समेत गरे।
अध्यक्ष ओलीले एमालेले जनताको चाहना र देशको हितमा मात्र काम गर्ने स्पष्ट पारे। पछिल्लो समय अंगिकृत नागरिकता र उनीहरुको नेपाली हैसियतका बारेमा चर्चा गरिएको समाचार प्रति इंकित गर्दे अध्यक्ष ओलीले नेपाली नागरिकले नेपालकै हितमा काम गर्नुपर्ने उल्लेख गर्दे त्यो काम एमालेले गर्ने स्पष्ट पारे।
अध्यक्ष ओलीले मुलुकको हित विपरीत काम गर्न खोज्नेहरुप्रति एमालेले सधैं खबरदारी गरिरहने बताए। अध्यक्ष ओलीले कलाकारले आफ्नो श्रृजना मार्फत देशभक्ति र राष्ट्रियतको पक्षमा खबरदारी गनुपर्ने बताए। उनले कलाकारले चित्त नबुझेका कुराहरुमा व्यांग्यात्मक रुपमा गीत गाउन पनि सुझाव दिए।