जापानको उत्तर–पश्चिमी क्षेत्र फुकुशिमामा गएराति ७.४ म्याग्निच्युडको भुइँचालो गएको छ। जापानको जलवायु तथा मौसम विभागले भुइँचालोका कारण सुनामी आउनसक्ने चेतावनी दिँदै फुकुशिमाका स्थानीयलाई अग्लो ठाउँमा बस्न सूचना जारी गरेको छ।
भुइँचालोले केही व्यक्ति सामान्य घाइते भएको रिपोर्ट आएको छ। सन् २०११ मा यही ठाउँमा भुइँचालो र सुनामी आएको थियो, जसले यो तटीय क्षेत्रमा १८ हजारभन्दा बढी ज्यान लिनुका साथै ठूलो परिमाणमा भौतिक संरचना ध्वस्त पारेको थियो।
पछिल्लो भुइँचालोको केन्द्रविन्दु जमिनको सतहबाट ३० किलोमिटर गहिराइमा रहेको विभागले जनाएको छ। यसले ३ मिटरसम्म अग्लो समुद्री छाल ल्याउने आँकलन गरिएको छ। फुकुशिमा आणविक भट्टीनिरको तटीय क्षेत्रमा पनि १ मिटर अग्लो छाल आउनसक्ने बताइएको छ। सन् २०११ को भुइँचालोले यो भट्टीमा ठूलो क्षति पुर्याएको थियो।
भुइँचालोको धक्का राजधानी टोकियोसम्म महसुस गरिएको छ। जापान भुइँचालो जाने जोखिमपूर्ण क्षेत्रमा पर्छ। संसारभरि ६ म्याग्निच्युड वा त्योभन्दा बढीका २० प्रतिशत भुइँचालो जापानमै जान्छ। यसअघि अप्रिलमा दक्षिणी कुमामोतोमा गएको भुइँचालोले कम्तीमा ५० जनाको ज्यान लिएको थियो।
यसबीच न्यूजिल्यान्डमा पनि मंगलबार बिहानै ५.६ म्याग्निच्युडको भुइँचालो आएको छ। जमिनको सतहभन्दा ३० किलोमिटर गहिरोमा केन्द्रविन्दु रहेको यो भुइँचालाले राजधानी वेलिङटनबाट दुई सय किलोमिटर उत्तरपूर्वी क्षेत्रमा प्रभाव पारेको बिबिसीले जनाएको छ। भुइँचालो कारण कोही घाइते भएको रिपोर्ट भने आएको छैन।
