सांसदहरुले योगदानमा आधारित सामाजिक सुरक्षाको व्यवस्था गर्नुपर्नेमा जोड दिएका छन्। अन्तराष्ट्रिय सम्बन्ध तथा श्रम समितिको मंगलबारको बैठकमा सामाजिक सुरक्षा प्रदान गर्न बनेको विद्येयकमाथिको छलफलमा भाग लिदै उनीहरुले यस्तो धारणा राखेका हुन्।
छलफलमा भाग लिदै नेकपा एमालेका सांसद विनोद श्रेष्ठले समाजमा योगदान दिएकाहरुलाई सामाजिक सुरक्षा सम्बन्धी हकको व्यवस्था गर्नुपर्नेमा जोड दिए। उनले सामाजिक सुरक्षाका लागि व्यवस्था गरिएको कोषको परिचालनमा श्रम मन्त्रालयले कडा निगरानी राख्नुपर्ने धारणा पनि राखे।
नेपाली कांग्रेसका सांसद मिन विश्वकर्माले वैदेशिक रोजगारीमा जानेहरुलाई झन्झटिलो व्यवस्था गर्न नहुने धारणा राखे। बैदेशिक रोजगारमा पठाउने म्यानपावरहरुले कामदारलाई पठाउँदा मन्त्रालयबाट पूर्वस्वीकृति, स्वीकृति र अन्तिम स्वीकृति लिने व्यवस्था गर्दा रोजगारदाता देशहरुले झन्झटिलो प्रक्रिया भन्दै नेपाली कामदारको विकल्प खोजिगरेको उल्लेख गर्दै छिटो प्रक्रियाबाट कामदार वैदेशिक रोजगारमा पठाउन व्यवस्था गर्नुपर्ने उल्लेख गरे।
एमालेका माधवकुमार नेपालले रेमिट्यान्सबाट भित्रिएको रकम राज्यले सदुपयोग गर्नेगरी व्यवस्था गर्नुपर्नेमा जोड दिए। रेमिटयान्सबाट प्राप्त रकम अनुपादक क्षेत्रमा लगानी भइरहेका बेला उनले त्यसको सदुपयोग राज्यबाटै गर्ने व्यवस्था गर्दा उपयुक्त हुने धारणा राखे।
विद्येयकमा समाजिक सुरक्षा कोषको स्थापना, संचालन र व्यवस्थापन गरी सामाजिक सुरक्षालाई व्यवस्थित, सुदृढ र प्रभावकारी बनाउने सम्बन्धि व्यवस्था गरिएको छ । दुई सन्तान जन्माउने महिलाको सुत्केरी पोषण खर्च, एकल महिला, जेष्ठ नागरिक, अपांग तथा अशक्त, कमैया, कम्लरी लगायतका व्यक्तिहरुलाई सामाजिक सहयोग प्राप्त गर्ने पनि विद्येयकमा उल्लेख गरिएको छ ।
