भारतीय क्रिकेटका चर्चित ब्याट्सम्यान युवराज सिंहले आफ्नो बिहेमा प्रधानमन्त्री नरेन्द्र मोदीलगायत विभिन्न मन्त्रीलाई निमन्त्रण गरेका छन्।
युवराज नोभेम्बर २९–३० मा बलिउड नायिका हेजल किचसँग बैवाहिक बन्धनमा बाँधिदैछन्। उनको बिहेमा बलिउड र क्रिकेट क्षेत्रका हस्तिहरूको ठूलो जमघट हुने बताइएको छ। युवराज बिहिबार बिहान भारतीय प्रधानमन्त्री मोदी र अन्य मन्त्रीलाई बिहेको निम्तो दिन आफै नयाँ दिल्लीस्थित ‘पार्लियामेन्ट हाउस’ पुगेका थिए।
३४ वर्षीय युवराज भारतले सन् २०११ को एकदिवसीय विश्वकप र २००७ मा टि–२० को विश्वकप जित्दा टोलीको मुख्य सदस्य थिए। यसै वर्ष युवराजले इन्डोनेसियाको बालीमा हेजललाई बिहेको प्रस्ताव गरेका थिए।