लामो दुरीका धावक एवम् विश्व पर्वतारोही सञ्जय पण्डित ११ घण्टा ४१ मिनेट ५७ सेकेन्ड निरन्तर उल्टो दौडेर काठमाडौँबाट दोलालघाट पुगेका छन् । कोटेश्वरदेखि काभ्रेको दोलालघाटसम्मको ५२.२ किलोमिटरको दुरी उनले उल्टो दौडेर पुरा गरेका हुन् । उल्टो हिँडेर अस्ट्रेलियाको सर्वोच्च शिखर कोजियस्को २२ नोभेम्बर २०१४ मा सफल आरोहण गरेको दिन पारेर उनी उल्टो दौडमा निस्केका हुन् ।
उनीसँग नेपालका चर्चित धावक भूमिराज राई, म्याराथन धावक सुरेन्द्र बस्नेत र केन्याका धावक पिटर मोङ्गेसहित १० जना दोलालघाट पुगेका थिए ।
मङ्गलवार ७ बजेर २५ मिनेटमा पूर्वअर्थ मन्त्री डा. रामशरण महत, ट्राफिक प्रमुख डीआइजी प्रकाश अर्याल, हिसानका अध्यक्ष रमेश कुमार सिलवाल, पूर्व सांसद् वीरबहादुर सिंह लगायतले संयुक्तरूपमा पण्डितलाई बिदाइ गरेका थिए ।
दोलालघाटका प्रहरी प्रमुख वीरेन्द्रकुमार सिंह तथा स्थानीयबासीले पण्डितलाई स्वागत गरेका थिए । सिंहले पण्डित दोलालघाटसम्म आएको पनि प्रमाणित गरिदिएका थिए
सञ्जयसहितको टोली दोलालघाटमा मङ्गलवार बेलुका ८ बजेर १४ मिनेटमा पुग्न सफल भएको थियो । पण्डितको टोलीलाई दौड अवधिभर नेपाल पुलिस तथा ट्राफिक पुलिसले साथ दिएको थियो ।
'मैले यो संसारलाई मान्छे उल्टो हिँड्नमात्र होइन, उल्टो दौडन पनि सक्छ भन्ने कुरा प्रमाणित गरिदिएको छु', पण्डितले दौडपछि खुसी हुँदै भने, 'अस्ट्रेलिया र अफ्रिकाको सर्वोच्च शिखर उल्टो हिँडेर आरोहण गर्दा उल्टोबाट पनि लामो दुरी दौडन सकिन्छ भन्ने लागेको थियो ।'
पण्डित लामो दुरीका धावक एबम् सगरमाथा लगायत विश्वका चर्चित हिमाल आरोहण गरेको विश्व पर्वतारोही पनि हुन् । पण्डितले २४९५ किलोमिटर लामो दुरीको दौड पनि दौडिसकेका छन् ।
अर्को वर्षदेखि नोभेम्बर २२ का दिन उल्टो दौड म्याराथन प्रतियोगिता राखिने पनि पण्डितले जानकारी दिए ।