कुनै पनि विकाश निर्माणको सुरूमा शिलान्यास र बनिसकेपछि उद्घाटन गर्ने परम्परा छ । तर यहाँ एक तत्कालिन सचिवले भने निर्माण सम्पत्र हुनु अघिनै एक भवनको उद्घाटन गरिदिएका छन्।
स्वास्थ्य तथा जनसंख्या मन्त्रालयका सचिव डाक्टर प्रविण मिश्रले महोत्तरीका पिपरास्थित १५ शैयाको पिपरा अस्पतालमा निर्माणाधिन भवनको २०७१ असार २२ गते उद्घाटन गरे । उद्घाटन भएको एक वर्ष वित्न लाग्दा पनि सो अस्पताल भवनको निर्माण कार्य जारी छ भने हालसम्म अस्पताल सुचारू भएको छैन ।
हतारमा गरिएको उद्घाटनको पछाडि स्वास्थ्य तथा जनसंख्या मन्त्रालयका सचिव पदबाट अवकास भएपछि महोत्तरीमा राजनीति गर्ने डाक्टर प्रविण मिश्रको जिल्लाको राजनीतिक बृतमा चर्चा र आशंकासमेत चल्यो।
सचिवबाट अवकास हुन १५ दिन अघि जिल्लामा जस बटुल्न डाक्टर मिश्राले निर्माण कार्य जारी रहेकै अवस्थामा उद्घाटन गरेको यहा विशलेषण गरिएको छ।
जिल्ला स्वास्थ्य कार्यालय महोतरीका प्रमुख डाक्टर मनिष कुमार पाण्डेले उद्घाटन गरिए पनि भवन निर्माणाधिन रहेकोले तत्काल सेवा सञ्चालन गर्ने अवस्था छैन। ‘भवन पूर्ण रूपमा तयार नभएकाले शहरी विकास तथा भवन निर्माण डिभिजन कार्यालय जनकपुरले हामीलाई हस्तान्तरण पनि गरेका छैन,’ उनले बताए ।
शहरी विकास तथा भवन निर्माण विभागका अनुसार पनि भवन पूर्णरुपमा तयार भईसकेको छैन । शहरी विकाश तथा भवन निर्माण डिभिजन कार्यालय जनकपुरका ईन्जीनियर महेश साहका अनुसार विसं २०७० साल वैशाख १७ गते देखि निर्माण सुरु भएको ४० कोठे भवन तयार हुन अझै ६ महिनाको समय लाग्छ।
निर्माणका लागि ५ करोड ७१ लाख बजेट विनियोजन गरिएको भवनमा असक्त विरामीलाई शैयासम्म लाने भर्याम, झयालमा सीसा जडान गर्न बाँकि रहेको छ भने शौचालय निर्माण गर्न बाँकी रहेको छ।
त्यसका लागि थप बजेट माग गरिएको साहले जनाए । लाइन र मिटर जडान नगरेकोले विधुत आपुर्ति हुन सकेको छैन। निर्माण स्थलको लेभल नमिलाईएकोले वर्षे भल सवै भवनभित्र पस्ने जस्ता अनेकन समस्या विद्यमान रहेको छ ।
जय ओम कमल जेभि कन्ट्रक्सन जनकपुरले ३ करोड ८२ लाख २७ हजार १ सय रुपैयामा ठेक्का लिएको सो अस्पताल भवनको विभिन्न कोठाहरु चर्किएको सिसाहरु फुटिएका छन्।
गुणस्तरहीन सिमेन्ट र बालुवा प्रयोग गरि बनाइएकाले ठाउठाउमा चर्किएको र सो भवन निर्माणमा लाखौं रुपैया अनियमितता भएको स्थानीयहरु बताउँछन्। ठेकेदार कम्पनीले ३ करोड २५ लाख भुक्तानी लिइसकेका छन्।
एक स्वास्थ्यकर्मीको भनाइअनुसार हतारमा गरिएको उदघाटनले अस्पतालको शिलालेखमा सचिव मिश्राले आफ्नो नाम लेखाउने बाहेक तत्काल जनताले कुनै उपलब्धि पाउने बाला छैनन्।