प्रमुख प्रतिपक्षी नेकपा एमालेले सरकारले ल्याएको संविधान संशोधन प्रस्तावका विरुद्धमा सदन र सडकमा संघर्ष गर्ने चेतावनी दिएको छ।
एमालेले सम्बन्धित प्रदेशका जनताको इच्छा विपरित ५ नम्बर प्रदेशलाई टुक्राउने प्रस्ताव ल्याएको भन्दै यसका विरुद्धमा भइरहेका आन्दोलनलाई साथ र समर्थन रहेको समेत स्पष्ट पारेको छ । ‘पाच नम्बर प्रदेशका जनता मिलेर बसेका थिए,’ सेतोपाटीसँग कुरा गर्दे एमाले संसदीय दलका उपनेता सुवास नेम्वाङले भने, ‘कसको माग पूरा गर्न पहाड र तराईलाई अलग गर्न लागिएको हो?’
संविधानलाई जनताले स्वीकार्दे गइरहेको बेला जनतालाई आन्दोलनमा उतारेर सरकारले शान्तिव्यवस्था खल्बल्याउन खोजेको नेम्वाङले बताए। ‘म केही दिन पहिला बुटवल भैरहवा पुग्दा त्यहाँका कुनै पनि पार्टी पाँच नम्बर प्रदेश टुक्राउने पक्षमा थिएनन्’, उनले भने, ‘प्रदेश टुक्रन नदिन उनीहरुले खबरदारी गरिरहेका थिए तर सरकारले जनताको आवाजलाई बेवास्ता ग¥यो।’
नब्बे प्रतिशतले बनाएको संविधान केही प्रतिशतले चित्त नबुझाउँदैमा प्रमुख विपक्षीलाई समेत बेवास्ता गरेर संविधान संशोधन गर्न खोज्नु दुर्भाग्य भएको नेम्वाङको तर्क छ। ‘हामीले पटक पटक संविधान संशोधनको औचित्यबारे सरकारसँग प्रश्न ग¥यौं तर सरकारले प्रतिपक्षसँग छलफल नै नगरी संशोधन प्रस्ताव दर्ता गरायो’, उनले भने।
प्रदेशको अधिकार कटौती गर्ने, सीमा फेरबदल गर्ने काम प्रदेशको अनुमतिले मात्रै सकिने भएकोले सरकारले संविधान विपरित काम गरेको नेम्वाङले बताए। यस विषयमा सर्वोच्च अदालतले समेत सरकारलाई छलफलका लागि मंसिर २१ गते बोलाएकोले यो काम सर्वोच्चको आदेश विपरित समेत भएको उनले बताए।
‘यो संशोधन प्रस्ताव एमालेलाई स्वीकार्य छैन। जे भइरहेको छ त्यो ठीक छैन’, उनले भने, ‘यो प्रस्तावले देशको अस्तित्व नै संकटमा पर्न सक्छ।’
अहिलेको प्रस्ताव बिगतमा एमाले कांग्रेसले ल्याएको सीमाकंनको खाकासँग मिल्दो रहेको भनेर तर्क गर्नु हाँस्यास्पद रहेको उनले बताए। त्यतिबेलाको समय अहिलेको समय धेरै फरक भइसकेको उनले बताए ।