भारतीय मुलकी मलेसियन नागरिक अलिस जोसेफ हिजो मंगलबार इत्तिहाद एयरबाट अपरान्ह ४ बजे नेपाल ओर्लिन। मलेसियन महिला त्यहि पनि एक्लै नेपाल आएपछि नेपाल प्रहरीको लागू औषध नियन्त्रण ब्युरोको टोलीले उनीमाथी अनुसन्धान बढायो।
ल्यापटम ब्यागमा फल्स बटमा उनले नेपाल ल्याएको डेढ किलो कोकिन प्रहरीले बरामद गर्यो। कहाँ र कसलाई दिन नेपाल आएको भन्दै प्रहरीले थप अनुसन्धान सुरु गर्यो। उनले एक जना काठमाडौंमा आफूलाई पर्खिबसेको र कोकिन उसलाई दिन आएपछि प्रहरीले कडा निगरानी गर्दे उनले ठमेलमा बुक गरेको होटलमा पठायो।
ती महिलाले बुक गरेको होटलको पल्लोपट्टि थिए मलेसियन नागरिक मागेन थिरन राजा । ती महिलाआएको थाहा पाएपछि उनी ती महिलालाई भेट्न गए। महिलाले ती पुरुषलाई कोकिन दिन लाग्दा उनी पनि पक्राउ परे।
एलिसले सो कोकिन नेपालमा ब्राजिलबाट ल्याएको खुल्न आएको डिआइजी जयबहादुर चन्दले बताए। 'उनी मलेसियाबाट आबुधाबी गइन,' डिआइजी चन्दले भने, 'त्यसपछि ब्राजिलको साय पाउलो र फेरि आबुधाबी हुदैँ नेपाल आइन।'
नेपाल आएपछि ती महिलाले राजालाई कोकिन बुझाउने र राजाले हङकङ लैजान लागेको अनुसन्धानबाट खुल्न आएको एसएसपी गणेश केसीले बताए। राजा भने १३ गते मात्र नेपाल आएका थिए।
पक्राउ परेका दुवै जना भरियामात्र भएको उनले बताए। उनीहरुलाई मलेसियाबाट तारा नामक गरेकी महिलाले खटाएको अनुसन्धानबाट खुल्न आएको छ। हङकङमा भने म्याक्स नाम गरेकालाई राजाले कोकिन लगेर बुझाउनु पर्दथ्यो। दुवै जना नेपाल पहिलो पटक आएका हुन्।
'मलेसियन महिला एक्लै यात्रामा निस्केपछि उनको प्रोफाइल हेर्यौं, शंका लागेपछि अनुसन्धान गर्दा उनको साथमा कोकिन भेट्यौं,' एसएसपी केसीले भने। बरामद भएको कोकिनको अन्तर्राष्ट्रिय मूल्य ३ करोड बराबरको रहेको ब्युुरोले जनाएको छ ।