प्रदेश नम्बर पाँचका नेताहरुले सरकारले संसदमा दर्ता गराएको संविधान संशोधन प्रस्ताव पारित हुन नदिन मोर्चाबन्दी सुरु गरेका छन।
त्यस क्षेत्रबाट प्रतिनिधित्व गर्ने सत्तारुढ काँग्रेस, माओवादी केन्द्रका नेताहरुले नै संविधान संशोधन प्रस्तावको विपक्षमा रहेको एमालेलाई साथ दिने घोषणा गरेका हुन्।
काठमाडौमा आयोजित साक्षात्कार कार्यक्रममा बोल्दै नेपाली काँग्रेसका नेता तथा गुल्मी क्षेत्र नं २ का सांसद चन्द्र भण्डारीले सरकारले ल्याएको संविधान संशोधन प्रस्ताव पारित नहुने ठोकुवा गरे। संविधान संशोधन प्रस्तावको विरुद्धमा पाँच नम्बर क्षेत्रका जनता आन्दोलित भएको भन्दै अब शासकहरु जनताको बल सामु झुक्नै पर्ने दाबी गरे। उनले सीमांकन हेरफेरको विषय आवश्यकता नरहेको बताए।
प्रमुख प्रमुख प्रतिपक्ष नेकपा एमालेका सचिव प्रदिप ज्ञवालीले जनभावना विपरित आएको संविधान संशोधन प्रस्ताव पारित नहुने बताए। उनले मुलुकलाई बहुराष्ट्र बनाउने उद्देश्यका साथ संविधान संशोधन प्रस्ताव आएको उल्लेख गर्दै त्यस विरुद्ध सशक्त आन्दोलन गर्ने चेतावनी दिए।
उनले नेकपा माओवादी केन्द्र्रका नेता टोपबहादुर रायमाझी समेत संविधान संशोधनको पक्षमा नरहेको उल्लेख गर्दै देशलाई गम्भीर दुर्घटनामा लैजान काम कसेैबाट पनि हुन नहुनेमा जोड दिए।
