सरकारले संसदमा दर्ता गरेको संविधान संशाेधन प्रस्तावको बिरोधमा गुल्मी, अर्घाखाँची र रुपन्देही जिल्ला अनिश्चितकालीन बन्द घोषणा गरिएको छ। एमालेकाे भातृ संगठन अखिल नेपाल राष्ट्रिय स्वतन्त्र विद्यार्थी युनियनले अनिश्चितकालीन रुपन्देही बन्दको घोषणा गरेको छ।
युनियनले बुधबार साँझ विज्ञप्ति निकाल्दै संशोधन प्रस्तावको बिरोधमा जिल्ला अनिश्चिचत बन्दको घोषणा गरेको हो। गुल्मीमा उद्योग वाणिज्य संघको संयोजकत्वमा गठन गरिएको संघर्ष समितिले अनिश्चितकालीन जिल्ला बन्द अायोजना गरेको हो।
विभाजनको विरोधमा अर्घाखाँचीमा पनि अनिश्चितकालिन जिल्ला बन्दको आव्हान गरिएको छ। उद्योग वाणिज्य संघ र युवा संघले आव्हान गरेको बन्दलाई सम्पूर्ण राजनीतिक दल, नागरिक समाज र विभिन्न संघ संस्थाहरुले ऐेक्यवद्धता जनाएका छन् ।
नेपाली कांग्रेसका सभापति विष्णु प्रसाद खनाल मुस्कानको संयोजकत्वमा गठित समितिको सदस्यहरुमा नेकपा एमालेका अध्यक्ष चेतनारायण आचार्य, नेकपा माओवादी केन्द्रका संयोजक ठाकुर कुमार विक किशोर, राष्ट्रिय जनमोर्चाका अध्यक्ष भविलाल थापा, नयाँ शक्ति नेपाल पार्टीका गोकर्ण थापा, परिवार दलका अध्यक्ष डिल्लीराज भुसाल, उद्योग वाणिज्य संघका अध्यक्ष कृष्ण प्रसाद श्रेष्ठ, पत्रकार महासंघका अध्यक्ष शोभाखर पन्थी, अन्तरपार्टी महिला सञ्जालकी अध्यक्ष सुशीला गैरे रहका छन् ।
पाँच नम्बर प्रदेश विभाजन गर्ने गरी सरकारले संसदमा दर्ता गरेको संविधान संशोधन प्रस्तावको विरोधमा सत्तारुढ र प्रतिपक्षमा रहेका दलले बुटवलमा सर्वदलीय भेला तथा प्रदर्शन गर्ने भएका छन्।
एमाले रुपन्देहीका अध्यक्ष शिव सुवेदीको अध्यक्षतामा बसेको राष्ट्रिय जनमोर्चा, जनमोर्चा नेपाल, नेकपा मार्क्सवादी लगायतका दलहरुको संयुक्त बैठकले केन्द्रीय स्तरका नेताहरुको सहभागितामा विरोध प्रदर्शन गर्ने निर्णय गरेको हो।
एमाले पोलिटव्यूरो सदस्य राधा ज्ञवालीले साविक ५ नं. प्रदेशका १२ वटै जिल्लाका सबै राजनितिक दलका प्रतिनिधीहरु समेत सहभागि हुने विरोध प्रदर्शनमा एमालेका उपाध्यक्ष्ँ बामदेव गौतम सहित उपमहासचिव विष्णु पौडेल, माओवादी केन्द्रका नेता टोपबहादुर रायमाझी र नेपाली कांग्रेसका चन्द्र भण्डारीले सम्बोधन गर्ने कार्यक्रम रहेको जानकारी दिइन्।
बुटवल लगायतका पांच नम्बर प्रदेशका सबैजसो जिल्लाहरुमा बिहानैदेखि आन्दोलन शुरु भएलगत्तै बसेको सर्वदलीय बैठकमा नेपाली कांग्रेस र माओवादी केन्द्रका प्रतिनिधि भने सहभागी भएनन्। यद्यपी संशोधन प्रस्ताव दर्ताको विरोधमा निकालिएका विरोध प्रदर्शनमा भने कांग्रेस र माओवादीका नेता तथा कार्यकर्ता अन्य समुहका नाममा सहभागी भएका थिए।
आजको सर्वदलिय बैठकले विहीबार पार्टिका भातृ संघसंगठनको अगुवाईमा बुटवल र एमालेको अगुवाईमा भैरहवामा प्रदर्शन गर्ने निर्णय गरेको एमाले रुपन्देहीका अध्यक्ष शिव सुवेदीले जानकारी दिए।
सरकारले पांच नं. प्रदेशका पहाडी जिल्लालाई अलग गराउने गरी संशोधन प्रस्ताव दर्ता गरेपछि सबैजसो जिल्लासंगै बुटवलपनि आन्दोलित भएको छ।
आन्दोलनरत विभिन्न समुहले अनिश्चितकालिन रुपन्देही बन्दको आव्हान गर्दै माईकिङ समेत गरेका छन्। अनेरास्ववियू र अखण्ड पांच नं. प्रदेश दवाद समुहले सरकारले तराई र पहाडलाई अलग्गाउने गरी प्रदेश विभाजनको प्रस्ताव दर्ता गराउनु राष्ट्र र नेपाली जनताको हित विपरित रहेको भन्दै पांच नं. प्रदेश बचाउन एकपटक फेरी सडकमा उत्रिन आव्हान गरेका छन्।
बिहानै विद्यार्थीहरुले शुरु गरेको प्रदर्शनपछि फरक फरक समुहको अगुवाईमा दिनभर विरोध प्रदर्शन भएका छन्। अनेरास्ववियू र अनेरास्ववियू छैठौंको अगुवाईमा विभिन्न क्याम्पसहरुबाट विद्यार्थीहरुले निकालेको विरोध जुलुश बुधवारको लागि १० बजे स्थगित गरिए लगत्तै अखण्ड पांच नं. प्रदेश दबाब समूहले प्रदर्शन गरेको छ।
दिउसो एमालेको अगुवाईमा निस्किएको विरोध प्रदर्शनमा विभिन्न दल सहित स्थानीयको व्यापक सहभागिता रहेको थियो। २०६२/६३ को जनआन्दोलनको झल्को दिनेगरी विभिन्न दलहरुको सहभागितामा प्रदर्शन भएको हो। नेकपा एमाले, राष्ट्रिय जनमोर्चा, नेकपा माले, जनमोर्चा नेपाल लगायतका विभिन्न राजनीतिक दलले बुधबार दिउँसो बुटवलमा बिरोध सभा गरी प्रचण्डले राष्ट्रघाती काम गरेको आरोप लगाएका छन्।
बिरोध सभामा बोल्दै नेकपा एमालेका केन्द्रीय सदस्य खिमलाल भट्टराईले संविधान संशोधन विधेयक तत्काल खारेज गर्न आग्रह गर्दै खारेज नगरिए आन्दोलनको बलमा खारेज गराएर देखाउने चेतावनी दिएका छन्।
विधेयक खारेजीका लागि पांच नम्बर प्रदेश हुंदै देश नै ठप्प पार्नेगरी आन्दोलन चक्राउने चेतावनी दिंदै प्रचण्ड सरकारले जनताको चाहाना नबुझे जनता रगत बगाउन तयार रहेको उनले चेतावनी दिए।
राष्ट्रिय जनमोर्चाका रुपन्देही अध्यक्ष वद्रे आलमले भारतको स्वार्थमा प्रचण्डले संविधान संशोधन विधेयक संसदमा दर्ता गरेर ईतिहांसमै राष्ट्रघाती काम गरेको बताए। नेकपा एमाले, राष्ट्रिय जनमोर्चा, नेकपा माले र जनमोर्चा नेपाल लगायतका दलले बुटवलको पुष्पलाल पार्क अगाडी चक्काजाम गरी बिरोध प्रर्दशन गरेका थिए।
संविधान संशोधन प्रस्ताव दर्ताको विरोधमा अर्घाखांचीबाट बुटवल आई बसेकाहरुले बुटवलमा चक्काजाम गरेका छन्। उनीहरुले भारतको इशारामा पाँच नम्बर प्रदेशलाई टुक्राउने सरकारको निर्णय फिर्ता नलिए माओवादी केन्द्रका केन्द्रीय तहका कुनैपनि नेतालाई अर्घाखाँची छिर्न नदिने चेतावनी दिएका छन्।