कतारले नेपालको जलविद्युत क्षेत्रमा लगानी गर्न इच्छा देखाएको छ।
नेपालका लागि कतारका राजदूत युसूफ महोम्मद अलीले नेपाल चेम्बर अफ कमर्सका पदाधिकारीसँगको भेटमा नेपालको जलविद्युत क्षेत्रको विकासमा लगानी गर्न आफनो मुलुक इच्छुक रहेको बताएका हुन्।
जमलस्थित चेम्बर अफ कर्मसको भवनमा सोमबार भएको भेटवार्ता दुई देशबीच हुने व्यापारका विविध क्षेत्रको विषयमा छलफल भएको थियो। राजदुत अलीसँगको भेट पछि सञ्चारकर्मीसँग कुरा गर्दै नेपाल चेम्वर अब कमर्सका अध्यक्ष राजेशकाजी श्रेष्ठले कतार नेपालको जलविद्युत क्षेत्रमा लगानी गर्न इच्छुक रहेको बताए।
उनले नेपाली कामदारलाई स्वदेशमै काम गर्ने अवसर सृजना गर्न पनि कतारले सहयोग गर्न सक्ने भन्दै राजदूत अलिको ध्यानाकर्षण गराइएको पनि जानकारी दिए।
कतार नेपाली कामदारलाई रोजगारी दिने मुलुकहरुको अग्रपंक्तिमा पर्छ। राजदूत अलिले नेपालमै रोजगारीको अवसर सृजना गर्न नेपालका व्यापारीसँग आवश्यक परामर्श गर्ने प्रतिवद्धता पनि व्यक्त गरेका थिए। कतारले नेपालको जलविद्युत क्षेत्रको लगानीका लागि आवश्यक छलफल गर्न एक कम्पनीलाई नेपाल पठाउने तयारी गरेको चेम्बर अफ कमर्सका अध्यक्ष श्रेष्ठले जानकारी दिए।
