नेपालको आन्तरिक राजनीतिक मामला आफैंले समाधान गर्ने बताउँदै नेकपा एमालेले विदेशी शक्तिको राजनीतिक चलखेल आफूलाई स्वीकार्य नहुने बताएको छ।
सोमबार अध्यक्ष केपी ओलीको निवास बालकोटमा बसेको एमाले स्थायी समिति बैठकले सबै पक्षसँग त्यस्तो हस्तक्षेप नगर्न अपिलसमेत गरेको छ। ‘नेपालको आन्तरिक मामलामा अनावश्यक हस्तक्षेप गर्ने र जनता भड्काउने काम कसैले पनि गर्नुहुँदैन,’ एमाले प्रचार प्रसार विभाग प्रमुख योगेश भट्टराईले सेतोपाटीसँग भने, ‘नेपालको आन्तरिक राजनतिक समस्याको हल नेपालीले नै गर्ने हो, विदेशीले होइन।’
बैठकको निर्णय सार्वजनिक नगर्न एमालेले अहिले विज्ञाप्ति तयार गर्दैछ।
नेपालको संविधान संशोधनको विषयमा काठमान्डुस्थित भारतीय दूतावास सक्रिय भइ ‘अनावश्यक हस्तक्षेप’ गरेको भन्दै एमालेले त्यस्तो निर्णय गरेको बताइएको छ।
एमालेले अब देशका प्रमुख शहरहरुमा पनि व्यापक प्रदर्शन गर्ने तयारी गरेको भट्टराईले बताए। ‘हामीले आन्दोलनलाई थप प्रभावकारी बनाउने निर्णय गरेका छौं,’ भट्टराईले भने, ‘अब मुलुकका प्रमुख शहरहरुमा देशव्यापी प्रदर्शनी गरिनेछ।’
त्यस्तै सत्तापक्षका दलहरुले एमालेलाई मुलुकका विभिन्न स्थाहहरुमा राजनीतिक सभा गर्न रोक लगाउने र पार्टीका कार्यालय तोडफोड गर्ने जस्ता काम गरेको आरोप लगाउँदै त्यस्ता कार्य तुरन्तै रोक्न सरकारलाई सचेत गराएको छ।
‘सत्तापक्षका दलहरुले गरेका त्यस्ता कार्यले पार्टीको ध्यानाकर्षण भएको छ,’ भट्टराईले भने, ‘यस्ता कार्य सत्तापक्ष द्वारा तुरन्तै रोकियोस्।’
