पहिल्यै अन्तिम १६ मा छनोट भइसकेको इङ्लिस क्लब लेस्टर सिटीलाई ५–० गोलले पराजित गर्दै पोर्चुगिज क्लब पोर्टो पनि नकआउट चरणमा प्रवेश गरेको छ।
च्याम्पियन्स लिगअन्तर्गत समुह ‘जी’ को खेलमा दोस्रो क्लबको रुपमा पोर्टो र कोपनहेगनबीच कुन टोली अन्तिम १६ मा प्रवेश गर्ने भन्ने प्रतिस्पर्धा थियो। यसैबीच बुधबार राती असम्भव झै लाग्ने नतिजा निकालेर पोर्टो नकआउट चरणमा प्रवेश गर्यो।
गत सिजन इङ्लिस प्रिमियर लिगको उपाधि जितेर पहिलो पल्ट च्याम्पियन्स लिग खेलिरहेको लेस्टरले अघिल्लो पाँच मध्ये ४ खेलमा जीत र एक बराबरी गरेर अपराजित टोलीको रुपमा नकआउट चरण प्रवेश गरेको थियो। तर, समुह चरणको अन्तिम खेलमा पोर्टोले अस्वभाविक झै लाग्ने ५–० को नतिजा निकालेपछि इङ्लिस क्लब स्तब्ध बन्न पुग्यो। लेस्टरको च्याम्पियन्स लिगमा अहिलेसम्मकै खराब प्रदर्शन हो।
यही समुहको अर्को खेलमा कोपनहेगनले पनि क्लब ब्रुगेलाई २–० ले हराएको थियो। तर, पोर्टोको रवाफिलो जीतको अगाडि कोपनहेगनको केही शीप लागेन्। पोर्टो ६ खेलमा ११ अंक बटुल्दै नकआउट चरणमा प्रवेश गरेको हो। कोपनहेगनले ९ अंक जोड्यो।
यसअघि लेस्टर १३ अंकसहित शीर्षस्थानमा रहँदै अघिल्लो चरणमा प्रवेश गरेको थियो। प्रशिक्षक क्लाउडियो रेनारीले १० खेलाडी परिवर्तन गरेको यस खेलमा भालान्टे सिल्भाले २, जेसस कोरोना, यासिन ब्राहिमी र टेक्सेरा डा सिल्भाले १–१ गोल गरेका थिए।