आर्थिक अभावका कारण दस वर्षदेखि भौंतारिरहेकी काभ्रेकी युवतीलाई दक्षिण कोरिया तथा हङकङमा रहेका नेपालीले आर्थिक सहायता गरेका छन्। काभ्रे चापाखोरी–२ की २२ वर्षीया मञ्जुमाया तामाङलाई उपचारमा सहयोग गरिएको हो।
दक्षिण कोरियाबाट संकलन भएको २ लाख ६५ हजार १ सय ३८ र हङकङबाट १ लाख ४५ हजार २ सय ५० रुपैयाँ शुक्रबार एक कार्यक्रमबीच अनामनगरमा हस्तान्तरण गरियो।
तामाङ त्रिवि शिक्षण अस्पतालमा विगत ८ वर्षदेखि उपचारमा धाइरहेकी छिन्। उनको दुबै कानको जाली च्यातिएको छ। कानको अप्रेसनका लागि अस्ट्रेलियाबाट उपकरण मगाउनुपर्ने डाक्टरले बताएका छन्।
‘दुई वटा कानको लागि २२ लाख रुपैयाँ लाग्ने डाक्टरले बताएका छन्,’ तामाङको उपचार खर्च जुटाउने अभियानमा रहेका काभ्रेका वाङजु तामाङले भने।
तामाङलाई मंसिर २९ गते शिक्षण अस्पतालले बोलाएको छ। उनको उपचार पुस ३ गतेदेखि सुरु हुने आफन्तले बताएका छन्।
कान सुन्न नसक्ने भएपछि तामाङलाई धुलिखेल अस्पताल लगियो। त्यहाँ उपचार सम्भव नभएपछि टिचिङमै ल्याइयो। यहाँ पनि सम्भव नहुने भन्दै डाक्टरले विदेश जान सुझाव दिएका थिए।
तर, अहिले कानको अप्रेसनका लागि यतै उपकरण मगाउने सकिने तर महंगो शुल्क लाग्ने डाक्टरले बताएका थिए। आर्थिक अभाव खेपेकी युवतीले स्वास्थ्य मन्त्रालयमा एक महिनाअघि निवेदन दिइन् तर त्यहाँबाट खर्च जुट्न नसकेपछि अभियान चलाइएको वाङजुले बताए।