३ हजार ६ सय करोडको अगस्टा वेस्टल्यान्ड हेलिकोप्टर खरिद घोटालामा दिल्लीको पटियाला हाउस अदालतले बायुसेनाका पूर्व प्रमुख एसपी त्यागीलाई १४ डिसेम्बरसम्म सोधपुछका लागि सिबिआईको कब्जामा राख्ने निर्णय सुनाएको छ।
अदालतको यो निर्णयसँगै पूर्व प्रधानमन्त्री मनमोहन सिंहको समस्या बढेको भारतीय अखबारहरूले जनाएका छन्। भारतीय टेलिभिजन आजतकले अगस्टा हेलिकोप्टर खरिदमा तत्कालिन युपीए सरकारका प्रधानमन्त्री मनमोहन सिंहको अफिसबाट सम्झौताका लागि ‘फेवर’ भएको बताएको छ।
त्यागीले अदालतलाई दिएको बयान अनुसार अगस्टासँग सम्झौता गराउन आकासमा उड्ने हेलिकोप्टरको मापदण्डमा छेडछाड गरिएको थियो। अगस्टा हेलिकोप्टरले सुरुमा सेनाले निकालेको मापदण्ड पुरा गर्न नसक्ने भएपछि उडानको मापदण्ड परिवर्तन गरिएको त्यागीले बयानमा बताएका छन्।
मापदण्ड परिवर्तन गर्न तत्कालिन रक्षामन्त्रालय र प्रधानमन्त्री कार्यालयले भूमिका खेलेको त्यागीले बताएका छन्। त्यागीलाई शुक्रबार पक्राउ गर्नुअघि सिबिआईले ४ घण्टा बयान लिएको थियो। उनले अगस्टा हेलिकोप्टर खरिदमा घोटाला भएको स्विकार गरेपछि पक्राउ गरिएको थियो।
