विश्वका तीन खतरनाक स्ट्राइकर भएको स्पेनको बार्सिलोना क्लबले च्याम्पियन्स लिगअन्तर्गत यो सिजनको पहिलो नकआउट खेल फ्रेन्च च्याम्पियन पेरिस सेन्ट जर्मनी (पिएसजी) सँग भिड्नु पर्ने भएको छ।
स्पेनिस ‘ला लिगा’ च्याम्पियन र फ्रेन्च च्याम्पियन क्लबबीचको यस खेललाई च्याम्पियन्स लिगको नकआउट चरणको ठूलो भिड्न्तको रुपमा लिइएको छ। बार्सिलोना र पिएसजीबीच सन् २०१३ यता च्याम्पियन्स लिगमा तीन पल्ट भिड्न्त भइसकेको छ। त्यसैले सोमबार साँझ स्विट्जरल्यान्डको लियोनमा सार्वजनिक खेल तालिकामा पिएसजीसँगको भिड्न्त पक्का भएपछि बार्सिलोनाले पुरानै साथीसँगको भेट भनेको छ।
बार्सिलोना यस वर्ष समूह चरणको खेलमा इङ्लिस क्लब म्यानचेस्टर सिटीलाई पछाडि छोड्दै विजेताको रुपमा छनोट भएको थियो। पिएसजी भने समुह ‘ए’मा आर्सनलपछि उपविजेताको रुपमा छनोट भयो।
बार्सिलोनाले सन् २०१३ र २०१५ मा क्वाटरफाइनलमा पिएसजीलाई हराएको थियो। २०१४ मा पनि समुह चरणको खेलमा यी दुई क्लबबीच भेट भएको थियो।
कुनै बेला बार्सिलोनाबाट व्यवसायिक फुटबल खेलेका डच मिडफिल्डर प्याट्रिक क्लुभर्ट हाल पिएसजी क्लबको प्राविधिक निर्देशक छन्। त्यसैले पछिल्लो समय पिएसजीको खेलमा थुप्रै सुधार देखिदै आएको छ।
फेरि टोलीमा तीन प्रभावशाली मिडफिल्डर इटालीका २४ वर्षीय मार्को भेराटी, फ्रान्सका ब्लाइस माटुडी र अर्जेन्टिनाका स्ट्राइकर एन्जल डि मारियाजस्ता प्रतिभा रहेका छन्। उरुग्वेका स्ट्राइकर इडिसन काभानी केही समय अगाडि ‘फर्म’ मा फर्किएका कारण पिएसजी निकै उत्साही छ।
जाल्टन इब्राहिमोभिकको लन्डन क्लब म्यानचेस्टर युनाइटेडको प्रस्थानपछि क्लुभर्ट बार्सिलोनाका स्टार स्ट्राइकर लिओनल मेसीलाई क्लबमा भित्र्याउन लालायित छन्। यस्तो अवस्थामा दुवै क्लबको भिड्न्तलाई निकै महत्वपूर्ण मानिएको छ। बार्सिलोनामा मेसीसहित ब्राजिलका नेइमार र उरुग्वेका लुइस सुआरेजको रुपमा ‘एमएनएस’ को धारिलो अग्रपंक्ति रहेको छ। फेरि मिडफिल्डमा आन्द्रेस एनिस्टाको आगमनले बार्सिलोना निकै उत्साही पनि छ।
