यसरी मनाइयो बसन्तपुरमा योमरी पुन्ही (फोटो फिचर)

नारायण महर्जन

मंगलबार योमरी (धान्य पूर्णिमा) पर्व मनाईएको छ। मार्ग शुक्ल पूर्णिमाका दिन उपत्यकाभित्रका नेवार समुदायले धुमधामको साथ यो पर्व मनाउँदै आएका छन्।

नेवार समुदायमा धान्य पूर्णिमाको साँझ घरघरमा गई योमरी माग्ने पनि प्रचलन छ। योमरीको अर्थ मनपर्ने रोटी हो। यो चामलको पीठोमा चाकु वा स्वादअनुसार खुवा, गुँदपाक, मासु राखेर बनाइने विशेष प्रकारको रोटी हो। यही रोटीको नामले यस पर्वको नामाकरण गरिएको हो। नेवार समुदायमा योमरीको विशेष महत्व छ।

आजको दिन योमरी नयाँ धानको चामलको पीठोबाट बनाइन्छ। चामलको पीठो मुछेर रोटीको माथिल्लो भाग गजुर जस्तै चुच्चो बनाई तल्लो भागको गर्भमा रहेको खाली भागमा विशेषगरी चाकु राख्ने गरिन्छ। आजभोलि खुवा, मासु, गुँदपाक, मास, मुँगीलगायत सामग्री राख्ने प्रचलन पनि छ।

यस दिनलाई ज्यापु दिवसको रुपमा पनि मनाउने परम्परा छ। ज्यापू दिवसकै अवसर पारेर काठमाडौको बसन्तपुरमा कार्यक्रम आयोजना गरिएको छ। कार्यक्रममा प्रधानमन्त्री पुष्पकमल दाहाल पनि सहभागी भएका थिए। उनले नेपालको पहिचानमा नेवारी समुदायको भूमिका अग्रणी रहेको भन्दै उनीहरुको मौलिक संस्कृति जोगाउन युवा पुस्ताहरुलाई अग्रसर हुन आह्वान गरे।

प्रकाशित मिति: 2016-12-13 17:14:02

प्रतिक्रिया दिनुहोस्