एएफसी कपको प्ले अफमा भएको गम्भीर लापरबाहीमा अखिल नेपाल फुटबल संघ (एन्फा) का हालका उच्च पदाधिकारी दोषी रहेको भन्दै थ्रीस्टार क्लबले छानबिनको कुनै औचित्य नरहेको बताएको छ।
एन्फाको कार्यसमिति बैठकमा संघका उच्च पदाधिकारीले आफूबाट भएको गल्ती स्वीकार गरिसकेको अवस्थामा नवनियुक्त उपाध्यक्ष वीरबहादुर खड्काको संयोजकत्वमा गठन भएको छानबिन कमिटीको कुनै औचित्य नरहेको थ्रिस्टारले जनाएको छ।
यस्तै, उसले कार्यकारी निर्देशक इन्द्रमान तुलाधरको कार्यप्रति गम्भीर आपत्ति जनाएको छ। गत वर्षको राष्ट्रिय लिग विजेता थ्रीस्टारले मंगोलियामा भएको एएफसी कपको समूह चरणमा समूहमा पहिलो हुँदै प्ले अफका लागि छानिएको थियो। यसैबीच, एसियाली फुटबल महासंघ (एएफसी) ले एन्फालाई क्लब दर्ताका लागि बारम्बार पत्र पठाएको थियो। तर, एन्फाको वर्तमान पदाधिकारीले एएफसीले पठाएको चिट्ठी गोप्य राखेर क्लबमाथि षड्यन्त्र गरेको आरोप थ्रीस्टारले मंगलबार पाटनको अशोक हलमा आयोजित पत्रकार सम्मेलनमा लगायो।
क्लबका महासचिव सञ्जिव शिल्पकारले एएफसीले एन्फालाई पठाएको एउटा पत्रको व्यहोरा उजागर गर्दै यसमा एन्फाका कार्यकारी निर्देशक (सिइओ) को गम्भीर त्रूटि भएको आरोप लगाए। उनले प्रतियोगिताका लागि थ्रीस्टारको दर्ता प्रक्रियालाई गोप्य राख्दै सिइओ तुलाधर विदेश उडेकोमा आपत्ति जनाए।
‘एएफसीले एन्फालाई पठाएको एउटा पत्रको पहिलो हरफमा थ्रिस्टार क्लबको दर्ता तुरुन्त गर्नू भनिएको छ। यसैको दोस्रो हरफमा कार्यकारी निर्देशकलाई विदेश भ्रमणको कार्यतालिका पठाइएको छ’, शिल्पकारले पत्रकार सम्मेलनमा भने, ‘यही चिट्ठीको आधारमा उहाँ (इन्द्रमान तुलाधर) विदेश पुगेर कार्यक्रममा भाग लिएर फर्किनुभयो। तर, क्लब दर्ताको विषयमा उहाँले चुँ पनि बोल्नुभएन। त्यसैले उहाँको संलग्नतालाई लिएर शंका उत्पन्न भएको छ।’
एन्फाको बढ्दो गैरजिम्मेवारीपनबाट क्लबको शाख घट्दै गएको भन्दै थ्रीस्टार क्लबका पदाधिकारीले दबाबका लागि क्लबहरूको छुट्टै संघ गठन गर्न प्रस्ताव राखेका छन्। यस्तै, थ्रीस्टारको आधिकारिक फ्यान क्लबका कृष्ण कार्कीले दोषीमाथि अविलम्ब कारबाही हुनुपर्ने, थ्रिस्टारले यो घटनामा एन्फासँग माग गरेको ६ करोड रुपैयाँ नपाएको खण्डमा सशक्त आन्दोनल थाल्ने चेतावनी दिए।
यसैक्रममा बंगबन्धु कपमा नेपाललाई उपाधि दिलाएका प्रशिक्षक बालगोपाल महर्जनले थ्रिस्टारको मुद्दा लापरबाहीको चरम भएको बताए। उनले एउटै पत्रको आधारमा कोही विदेश पुगेर आउने तर क्लबलाई खेल्नबाट बञ्चित गर्ने प्रवृत्ति घातक भएको बताए।
थ्रीस्टारको विरोध कार्यक्रममा ऐक्यवद्धता जनाएका जावलाखेल क्लबका अध्यक्ष ठूलभाई केसीले स्वतन्त्र व्यक्तिको नेतृत्वमा छानबिन कमिटी गठन गरेर दोषीमाथि कारबाही हुनुपर्ने बताए। उनले पनि अब क्लबहरू एकजुट हुनु पर्ने कुरामा सहमति जनाए। ‘एन्फाको नचाहिँदो कामप्रति औला उठाउन पनि क्लबहरूको छुट्टै संघ अपरिहार्य भइसकेको छ।’
हाल थ्रीस्टार क्लबको प्रशिक्षक रहेका मेघराज केसीले एन्फाको पहिलेको नेतृत्वका कारण फुटबलको २० वर्षको लगानी खेर गएको र एन्फाको नेतृत्व यसरी नै गैरजिम्मेवारीपूर्ण ढंगले चल्ने हो भने अबको नेपालको फुटबल २० वर्ष पनि बेकार जाने बताए। निकै दुःखी देखिएका मेघराजले एन्फाको अनैतिक कामको विरोधमा सबै एकजुट हुन जरूरी भइसकेको बताए।
यसअघि क्लबका कार्यवहाक अध्यक्ष अरुणमान जोशीले आफूले माग गरेको ६ करोडको क्षतिपूर्ति नपाएको खण्डमा आफ्नो क्लब फुटबल गतिविधिमा संलग्न नहुने बताए।
