श्रीलंकामा जारी एसिसी यू–१९ एसिया कपमा लगातार दोस्रो खेलमा पराजित भएसँगै बाहिरिएको नेपालले समूह चरणको अन्तिम खेलमा अहिलेर मलेसियासँग प्रतिस्पर्धा गरिरहेको छ। मलेसिया पनि प्रतियोगिताबाट बाहिरिएकाले औपचारिकतामै सीमित खेलमा नेपालले टस जितेर मलेसियालाई ब्याटिङको निम्तो दिएको छ।
यो समाचार तयार पार्दासम्म मलेसियाले निर्धारित ५० ओभरको खेलमा ३४ ओभर खेल्दै ८ विकेट गुमाएर १२० रन बनाइसकेको छ। नेपालका लागि आदिल खानले ३ तथा सन्दिप लामिछाने, दीपेन्द्रसिंह ऐरी र रोहितकुमार पौडेल र शुभकंर उराउले १-१ विकेट लिइसकेका छन्।
पहिलो खेलमा आयोजक श्रीलंकासँग १ रनको झिनो अन्तरले पराजित भएको नेपाललाई दोस्रो खेलमा भारतले ६ विकेटले हराएको थियो । मलेसियालाई पनि श्रीलंका र भारतले हराएका थिए । प्रतिष्ठाको लडाइँ कोलम्बो उड्नुअघि सेमिफाइनल पुग्ने लक्ष्य बनाएको नेपालका लागि मलेसियाविरुद्धको खेलमा सान्त्वना जित निकाल्ने अवसर छ ।
भारत र श्रीलंकासँग भारी अन्तरले पराजित भएको मलेसियाले नेपालभन्दा कमजोर खेल प्रदर्शन गरेको छ। मलेसियालाई भारतले २ सय ३५ तथा श्रीलंकाले ८ विकेटको फराकिलो अन्तरले पराजित गरेको थियो । जसको फाइदा उठाउने अवसर नेपाललाई छ ।