तिब्र गतिमा आएको रात्री बसको ठक्करबाट बर्दिया राष्ट्रिय निकुञ्जमा रहेको बयस्क पाटे बाघको मृत्यु भएको छ।
बर्दियास्थित पूर्व-पश्चिम राजमार्ग अन्तर्गत बर्दिया राष्ट्रिय निकुञ्ज भित्र पर्ने आम्बासा र चिसापानी बिचको कुँवाभार नजिक बुधवार साँझ पश्चिमबाट तिब्र गतिबाट आएको बसको ठक्करबाट पाटेबाघ मरेको बर्दिया राष्ट्रिय निकुञ्जका प्रमुख संरक्षण अधिकृत रमेश थापाले सेतोपाटीलाई बताए।
पश्चिमबाट पूर्वतर्फ गईरहेको ना ४ ख २८८७ नम्बरको बसले ठक्कर दिँदा पाटे बाघको मृत्यु भएको थापाले बताए। विभिन्न समयमा पनि तिब्र गतिको सवारी साधनले ठक्कर दिएर मृग, चित्तल लगायतका बदेल लगाएतको मृत्यु हुने क्रम बढ्दो छ। गाडीको ठक्करबाट बाघ मरेको यो पहिलो घटना हो।
निकुञ्ज भित्र पर्ने राजमार्गको सडकमा टाइम कार्डको व्यवस्था गरे पनि सवारी धनीले तिब्र गतिमा सवारी साधन चलाउँदा दुर्घटना बढी हुने गरेको थापाले बताए।
टाइम कार्डको प्रयोगले निकुञ्ज भित्रका सडक दुर्घटना कम हुन नसकेकोले अबका दिनमा टाइम कार्डको प्रयोग कडा रुपमा लागू गरिने समेत थापाले जानकारी दिए। गाडीको ठक्करबाट वन्यजन्तु मर्ने मुख्य चुनौतीको विषय बनेको छ।
यसैबीच प्रहरीले बाघलाई ठक्कर दिने बस नियन्त्रणमा लिएको छ ।
बर्दिया राष्ट्रिय निकुञ्जमा अहिले क्यामेरा ट्रयापिङ्ग प्रविधिबाट बाघको आहार प्रजाती र बाघको गणना चलिरहेको छ।
बर्दिया राष्ट्रिय निकुञ्जमा हाल ५० वटा वयस्क पाटे बाघ, ६ वटा अर्ध वयस्क र २९ वटा बाघका बच्चा गरि जम्मा ८५ वटा पाटे बाघ रहेको पछिल्लो तथ्याङ रहेको छ।