पेट्रोलियम पदार्थको मूल्य घटाउन व्यवस्थापिका संसदको उद्योग वाणिज्य तथा उपभोक्ता हित सम्बन्ध समिति अन्तर्गतको आपूर्ति तथा उपभोक्ता हित सम्बन्ध उपसमितिले सरकारलाई निर्देशन दिएको छ । बिहीबार बसेको उपसमितिको बैठकले नेपाल आयल निगम र आपूर्ति मन्त्रालयलाई मूल्यवृद्धिको निर्णय स्थगन गर्न निर्देशन दिएको हो।
आयल निगमले पेश गरेको तर्क उपयुक्त नभएकोले मुल्यवृद्धि निर्णय फिर्ता लिन निर्देशन दिएको समिति सचिव सुदर्शन खड्काले सेतोपाटीलाई जानकारी दिए। आयल निगमले रक्सौलमा तेलको मुल्य बढी भएकोले चोरी निकासी हुने भन्दै मुल्य बढाएको तर्क पेश गरेको थियो। निगमको तर्क आधारहिन भएको भन्दै समितिले यस्तो आदेश दिएको हो।
निगम आफैंले बनाएको कार्यबिधि विपरीत तेलको मूल्य बढाएको भन्दै उपसमितिले तत्काल पुरानै मूल्य कायम राख्न निर्देशन दिएको हो।
आयल निगमले पेट्रोल, डिजेल र मट्टितेल सबैमा मंगलबार चार रुपैयाँ ५० पैसा मूल्यवृद्धि गरेको थियो।