उर्जामन्त्री जनार्दन शर्माले काठमाडौंमा लोडसेडिङको अन्त्य हुनु प्रधानमन्त्री प्रचण्डको परिकल्पना र निर्देशनको परिणाम भएको बताएका छन्। शुक्रबार गोरखाको दरौदी नदीमा निर्मित ६ मेघावाटको दरौदी ‘ए’ साना जलविद्युत् आयोजनाको उद्घाटन कार्यक्रममा उर्जामन्त्रीले उक्त कुरा बताएका हुन्।
कार्यक्रममा ‘नेपालको पानी, जनताको लगानी’को अवधारणा सरकाले अघि सारेको जानकारी दिँदै उनले भने, ‘सम्माननीय प्रधानमन्त्रीको निर्देशन बमोजिम सरकारले उज्यालो नेपालको अभियान चलाइरहेको छ। हामीले प्रविधि र चुहावटमा भएको बेथिति कम गरेर काठमाडौंमा लोडसेडिङ अन्त्य गरेका छौं। नयाँ आयोजनाहरुको सञ्चालन, प्राधिकरणका बेथितिको अन्त्यले लोडसेडिङ अन्त्य गर्न सकिन्छ। अहिले काठमाडौंमा लोडसेडिङको अन्त्य गरिएको छ, यो प्रधानमन्त्री प्रचण्डको परिकल्पना र निर्देशनको परिणाम हो।’
सो कार्यक्रम उद्घाटन गर्न गोरखा पुगेका प्रधानमन्त्री पुष्पकमल दाहालले देशैभरी लोडसेडिङ अन्त्य गर्ने तयारी गरिरहेको बताए। आयोजनाको उद्घाटन गर्दै प्रधानमन्त्रीले भने, ‘सरकारले जनताको जीवनमा प्रत्यक्ष अनुभूति हुने गरी काम गरिरहेको छ। काठमाडौंमा लोडसेडिङ अन्त्य गरिएको छ। देशैभरी लोडसेडिङ कसरी अन्त्य गर्न सकिन्छ भनेर हामीले गृहकार्य गरिरहेका छौं। हामी छिट्टै देशव्यापी लोडसेडिङ अन्त्य गर्ने तयारी गरिरहेका छौं। विश्वास छ, यसमा सरकार सफल हुन्छ।’
प्रधानमन्त्रीले भने, ‘राष्ट्रिय गौरवका आयोजनाको अनुगमन र निरिक्षणमा म आफैं दौडिएको छु। मेरो निरिक्षणपछि कामहरु रफ्तारमा अघि बढेका छन्। सरकारले समयभन्दा अघि नै गुणस्तरीय काम गर्ने कर्मचारी र आयोजनाहरुलाई पुरस्कृत गर्नेछ। हामी सबैले निष्ठावान् भएर काम गरौं, परिणाम राम्रो आउँछ। राष्ट्र निर्माणमा हामी सबै जिम्मेवार भएर लाग्नुपर्छ।’
उद्घाटनमा संघीय मामिला तथा स्थानीय विकास मन्त्री हितराज पाण्डेले प्रचण्ड नेतृत्वको सरकार जनप्रिय कामका लागि क्रियाशील भएको बताए। प्रधानमन्त्रीको निर्देशन बमोजिम उर्जा मन्त्रालयले देशैभरी लोडसेडिङ अन्त्यको प्रयास गरिरहेको बताउँदै मन्त्री पाण्डेले भने, ‘कालिका ‘ए’ साना जलविद्युत् आयोजनाले सरकारको योजनामा सहयोग गर्ने अपेक्षा गरेका छौं।’
कालिका पावर कम्पनी लिमिटेडले उत्पादन गरेको दरौदी ‘ए’ साना जलविद्युत् आयोजनाबाट ६ मेघावाट विद्युत् उत्पादन हुनेछ। २०६३ पुस ९ गते विद्युत् उत्पादनका लागि अनुमति पाएको कालिका पावर कम्पनीले १ अरब ३० करोड लागतमा आयोजना सम्पन्न गरेको कम्पनीका निर्देशक निकोलस पाण्डेले जानकारी दिएका छन्।
