तस्बिरहरूः अनिश रेग्मी
राष्ट्रपति विद्यादेवी भण्डारीले औपचारीक रुपमा घोषणा गरेपछि पूर्वाञ्चलमा २७ वर्ष लामो प्रतिक्षापछि बृहत राष्ट्रिय खेलकुदको सातौं संस्करण सुरु भएको छ। विभिन्न पारम्परिक झाँकी र भेषभूषासहित मोरङको विराटनगस्थित सहिद मैदानमा सुरु भएको बृहत खेलकुद ८ दिनसम्म चल्नेछ। प्रतियोगिताको समापन पुस १५ मा धरानको एन्फा कम्प्लेक्समा हुनेछ।
२०३८ सालदेखि सुरु भएको बृहत राष्ट्रिय खेलकुदको पाँचौ संस्करण २०४६ सालमा पूर्वाञ्चलमा आयोजना गर्ने लक्ष्य थियो। तर, प्रजातान्त्रिक आन्दोलन र बीचका केही वर्ष राजनीतिक खिचातानीका कारण प्रतियोगिता ओझलमा परेको थियो।
२०६३ सालमा गणतन्त्र स्थापना भएपछि विराटनगरमा गर्ने भनिएको प्रतियोगिता काठमाडौंमै आयोजना गरिएको थियो। छैठौं बृहत धनगढीमा पाँच वर्षअघि सम्पन्न भएको थियो।
‘यस हिसाबले पनि पूर्वाञ्चलमा आयोजना हुन लागेको प्रतियोगिता ऐतिहासिक हो। त्यसैले सबै पूर्वाञ्चलवासीलाई सहयोग गर्न आग्रह गरेको छु,’ राष्ट्रिय खेलकुद परिषद्का सदस्यसचिव केशवकुमार बिष्टले भने।
शुक्रबारबाट सुरु भएको प्रतियोगिता पूर्वान्चलका ६ जिल्लामा आयोजना हुँदैछ, जहाँ २ सय ९४ स्वर्ण पदकका लागि ३९ सय ७२ खेलाडी प्रतिस्पर्धा गर्दैछन्।
प्रतियोगिताको उद्घाटन सत्रमा ३५ सयले मार्चपासमा भाग लिएका थिए। जसमा पाँच विकाश क्षेत्र र तीन विभागीय टिमले मार्च पासमा भाग लिए। सातौंको दीप प्रज्वलन पूर्वाञ्चलका पहिलो ओलम्पियन बक्सर नरेन्द्र पुमोले गरे। पुमोले सन् १९८० को मस्को ओलम्पिकमा भाग लिएका थिए।
उद्घाटनमा सर्वोच्च अदालतले गैरकानुनी भनेको नेपाल ओलम्पिक कमिटीका अध्यक्ष जीवनराम श्रेष्ठलाई राष्ट्रपति विद्यादेवी भण्डारीसँगै अतिथिको रुपमा मञ्चमा राखेको विषयमा विरोध भएको थियो। खेलकुद परिषद्का कोषाध्यक्ष सुरेन्द्र हमाललगायतको टोलीले यसको विरोध गरेको थियो।