प्रधानमन्त्री झोलामा कैची र रिबन बोकेर उद्घाटन गर्दे हिडेका छन्ः ओली
प्रमुख प्रतिपक्षी एमालेका अध्यक्ष केपी ओलीले सरकारले संसदमा दर्ता गरेको संविधान संशोधन विधेयक राष्ट्रियता र राष्ट्रिय अखण्डता बिपरित रहेकोले संसदमा छलफल हुन नसक्ने बताएका छन्।
एमालेसहितका बिपक्षी नौं दलले आयोजना गरेको पत्रकार सम्मेलनमा बोल्दै अध्यक्ष ओलीले संसदमा थुप्रै विषयमा छलफल हुन सक्ने भए पनि संविधान बिपरितका प्रस्तावमा छलफल हुन नसक्ने स्पष्ट पारेका हुन्। ‘यो प्रस्ताव पास हुन्न र छलफल पनि हुन्न,’ओलीले भने, ‘राष्ट्रिय स्वाधीनता र अखण्डताका विषयमा संसदमा छलफल र मतदान हुँदा बिभिन्न देशहरु के भएका छन्?’
सरकारले संसदमा दर्ता गराएको संविधान संशोधन विधेयक संसदमा छलफल गर्न लायक नै नभएको उनले बताए। संविधानको कार्यान्वयन गर्नुपर्ने सरकारनै उत्तेजक भएर प्रस्तुत भइरहेको उनको आरोप थियो।
संविधान संशोधनका नाममा सरकारले देशमा तनाव उत्पन्न गराइरहेको ओलीले बताए ।
‘अहिले प्रधानमन्त्रीले जे बोल्दै हिड्नुभएको छ। त्यस्तो कुनै देशको प्रधानमन्त्रीले बोल्न सक्छ?’, ओलीले भने, ‘प्रधानमन्त्रीको बोली उत्तेजना फैलाउने र तानशाही शैलीको छ।’
प्रधानमन्त्री समक्ष निकै आक्रमक देखिएका ओलीले शान्तिपूर्ण रूपमा भएको जनताको आन्दोलनलाई बितण्डाको संज्ञा दिएको भन्दै आपत्ती जनाए। रूपन्देहीमा एमाले कार्यकर्ताको हत्याको विषयमा सरकारी सञ्चार माध्यम र सरकार समर्थित अन्य सञ्चार माध्यमहरुले त्यसलाई गलत तरिकाले ब्याख्या गरेको ओलीले आरोप लगाए।
‘छानबिनका क्रममा अनेक कुराहरु आउन सक्छन् त्यो स्वभाविक हुन सक्छ,’ उनले भने, ‘सरकार समर्थीत मिडियाहरुले अहिले नै कहानी निकालेर परिस्थितिलाई उत्तेजक बनाउने काम भएको छ।’
प्रतिपक्षलाई जिल्ला जान दिन्नौं भनेर सरकार पक्षले धम्की दिएको भन्दै ओलीले एमालेले यस्ता धम्कीको प्रतिवाद गर्ने चेतावनी दिए। उनले निषेधको राजनीति एमालेले नसहने समेत बताए।
‘सरकारले निर्वाचनका लागि के गरेको छ?’ उनले प्रश्न गरे, ‘स्थानीय निकाय पुनर्संरचना आयोगको प्रतिवेदन बुझ्न मानेको छैन। निर्वाचन क्षेत्र निर्धारण आयोग बनाएको छैन।’ निर्वाचनका कार्यक्रम लिएर आउन समेत उनले सरकारलाई आग्रह गरे ।
२०७४ माघ ७ गतेभित्र तीन तहको निर्वाचन गर्नुपर्ने संवैधानिक व्यवस्था अनुसार सरकारले काम नगरेको उनले बताए ।
‘विकासमा ध्यान दिएको छु भन्ने प्रधानमन्त्रीले गुरिल्ला ट्रेकीङको उद्घाटन गर्दे हिड्नुभएको छ,’ उनले भने, ‘वास्तवीक वितण्डाको इतिहासलाई जय जयकार गर्दे हिड्ने?’ प्रधानमन्त्री भएको बेलामा रिबन काट्दिन भनेर प्रतिबद्धता जनाएका प्रधानमन्त्रीले अहिले भने झोलामा कैची र सलाई हालेर हिड्ने गरेको ओलीले बताए।
