सशस्त्र प्रहरी बलले सातौं राष्ट्रिय खेलकुद महोत्सवमा अभद्र व्यवहार गर्ने सीता राना मगरसहित महिला क्रिकेट टोलीमाथि छानबिन सुरु गरेको छ।
सशस्त्र प्रहरी बल मुख्यालय हलचोकले क्रिकेट खेलाडीले अनुशासन विपरित काम गरेपछि डिआइजी सुरज श्रेष्ठको संयोजकत्वमा ३ सदस्यीय छानबिन समिति गठन गरेको छ। समितिमा एसएसपी राजु अर्याल र डिएसपी विश्व बन्धु सदस्य छन्।
श्रेष्ठ पूर्वान्चल बाहिनीका बाहिनीपति हुन्। ‘सशस्त्र प्रहरी अनुशासित फौज हो,’ सशस्त्र प्रहरीका प्रवक्ता दिवाकर केसीले सेतोपाटीसँग भने, ‘अनुशासनसँग सम्झौता गर्ने काम सशस्त्रले गर्दैन।’
‘मंगलबारको घटनाबारे वास्तविकता के हो, डिआइजीको संयोजकत्वमा छानबिन समिति बनाइएको छ,’ उनले भने, ‘छानविनपछि दोषी देखिए महिला क्रिकेट खेलाडीमाथि कारबाही हुन्छ।’ उनका अनुसार छानबिन समितिले अहिले इटहरीमा पुगेर सत्यतथ्य बुझिरहेको छ।
उनका अनुसार खेलाडी विराटनगर जानुअघि भएको बिफ्रिङमा अनुशासनको पाठ सिकाइएको थियो। ‘खेलमा हार जित जे जस्तो भए पनि अनुशासित रहेर खेल्न हामीले निर्देशन दिएका थियौं, तर खेलाडीहरुले त्यो भूले’, सशस्त्रका एक उच्च अधिकारीले सेतोपाटीसँग भने।
गत मंगलबार पूर्वाञ्चलविरुद्ध फाइनलमा जीत नजिकै पुगेर खेल बहिस्कार गरेको एपिएफबाट खेलिरहेकी सीताले विपक्षी खेलाडीमाथी मैदानमै माझी औला देखाएकी थिइएन। (हेर्नुहोस् समाचारमा)
उनको नौलो रुप देखेर मैदानमा उपस्थित सबै दर्शक छक्क परेका थिए। उनीसँगै मैदानमा अभद्र रुपमा प्रस्तुत हुनेमा कप्तान बीनु बुढामगर, सरिता रानामगर र सोनु खड्काले पनि अभद्र व्यवहार देखाएका थिए। रितु कनौजियाले विपक्षी खेलाडीलाई अपमानित गर्दै पैसाको धम्की दिएकी थिइन्। उनीहरूले पूर्वाञ्चलका खेलाडीलाई पैसाको लोभी भन्ने आरोपसमेत लगाएकी थिइन्।
एपिएफका यी खेलाडीहरुको अनुशासनहीन व्यवहार देखेपछि पदक बाड्न आएका राष्ट्रिय खेलकुद परिषद्का सदस्य–सचिव केशवकुमार बिष्ट बीचैबाट निस्किएका थिए।
राष्ट्रिय खेलकुद परिषद्को अनुगमन कमिटीले यो घटनाको निष्पक्ष छानबिन गर्ने बताएको छ।
यसरी सुरु भयो विवाद
पूर्वाञ्चलले एपिएफलाई ६५ रनको लक्ष्य दिएको थियो। एपिएफलाई अन्तिम १२ बलमा १३ रन चाहिएको थियो । एपिएफसँग दुई विकेट बाँकी थियो ।
लक्ष्य पछ्याएको इनिङको १८औँ ओभरमा पूर्वाञ्चलकी कप्तान कविता गौतमले बलिङ गरेकी थिइन् । १८.४ बलमा एपिएफकी रितु कनौजियाले आकर्षक सट प्रहार गरिन् । बाउन्ड्री लाइनमा पूर्वाञ्चलकी फिल्डर अप्सरा वेगमले रितुद्वारा प्रहार बल समात्न सकिनन् । बल बाउन्ड्री घेरिएको डोरीनजिक खस्यो । त्यसपछि वेगम बललाई खुट्टाले रोक्दै बाउन्ड्री बाहिर गइन् र डोरी नाघ्दै बल टिप्दै क्रिजतर्फ फ्याँकिन्।
अम्पायर अधिद प्रधानले वेगमलाई बलले बाउन्ड्री लाइनको डोरीमा छोएको वा नछोएको भनी सोधे । वेगमले बल बाउन्ड्री लाइनभन्दा बाहिर नगएको बताइन् । अम्पायर प्रधानले वेगमकै कुरा सही माने।
यतिवेलासम्म एपिएफका खेलाडी शान्त नै थिए।
एपिएफले थप दुई बल खेल्यो । गौतमले दुवै बल वाइडका रूपमा फ्याँकिन् । पूर्वाञ्चलकी खेलाडी गौतमले १८औँ ओभरको अन्तिम दुई बल वाइड फ्याँकेपछि एपिएफका खेलाडी विवादमा उत्रिए।
अम्पायर र विपक्षी खेलाडीबीच मिलेमतो भएको दाबी गर्दै एपिएफका खेलाडीले मैदान छाडे। आयोजक र प्राविधिक पक्षले एपिएफका खेलाडीलाई सम्झाउने धेरै कोसिस गरेका थिए ।
आधा घन्टासम्म पनि एपिएफका खेलाडी मैदानमा आएनन्।
फाइनल खेलका म्याच कमिस्नर सत्यजित सरकारले अन्तिम चेतावनी दिँदै एपिएफलाई पाँच मिनेटभित्र मैदानमा फर्कन र खेल्न आग्रह गरे । तर, एपिएफका ब्याट्सम्यान क्रिजमा फर्केनन् । म्याच कमिस्नर सरकारले पूर्वाञ्चललाई चार रनले विजयी घोषणा गरे ।
