गुरूङ समुदाय झुम्यो ल्होछारमा

नारायण महर्जन

तमु ल्होछारको अवसरमा शुक्रबार राजधानीको टुँडिखेलमा विशेष कार्यक्रम गरिएको छ। काठमाडौं उपत्यका र त्यस वरपरका जिल्लामा बसोबास गर्दै आएका गुरुङ समुदायहरु शुक्रबार राजधानीको टुँडिखेलमा जम्मा भई ल्होछार मनाएका हुन्। विभिन्न परम्परागत भेषभुषामा सजिएका महिला पुरुषको झाँकीसहितको प्रर्दशनले टुँडिखेल निकै मनमोहक देखिएको थियो।

विशेष समारोहमा तमु समुदायका परम्परागत विभिन्न झाँकीहरु प्रर्दशन गरियो।ल्होछार समारोहको उद्घाटन गर्न पुगेका प्रधानमन्त्री पुष्पकमल दाहालले सम्पुर्ण गुरुङ समुदायलाई शुभकामना दिदंै पहिलोपटक जातीय पहिचान स्वायक्तता र आत्मनिर्णयको अधिकार उठाउने समुदाय नै गुरुङ समुदाय भएको भन्दै प्रशंसा गरे।

बौद्ध धर्म अन्तर्गत महायान् सम्प्रदायको सांस्कृतिक पर्वको रुपमा मनाईने यस पर्वलाई गुरुङ समुदायले नयाँ वर्षकोरुपमा मनाउने गर्छन्। काठमाडौं उपत्यकालगायत गुरुङ बसोबास भएका स्थानमा यो पर्व भव्यताका साथ मनाउने गरिन्छ। सरकारले यो पर्वका अवसरमा सार्वजनिक बिदासमेत दिने गरेको छ। गुरुङ समुदायले शुक्रबारदेखि बाँदर वर्गको बिदाई र चरा वर्गको आगमनको स्वागत गर्दे नयाँ वर्ष मनाएका हुन्।

हेर्नुहोस् ल्होछारका केही दृश्य