शहरी विकास मन्त्री अर्जुननरसिंह केसीले संविधान जारी गर्ने बखत एकजुट भएका दलहरुनै संविधान कार्यान्वयनमा प्रतिबद्ध हुनुपर्नेमा जोड दिएका छन्।
नुवाकोटमा जयराम दवाडीको मेरो जीवन यात्रा पुस्तकको सोमबार राजधानीमा विमोचन गर्दै मन्त्री केसीले संविधान कार्यान्वयनमा फेरि एकपटक मुख्य दलहरु मिल्नुको विकल्प नभएको बताएका हुन्। मुख्य राजनीतिक तीन शक्ति नेपाली कांग्रेस, नेकपा एमाले र माओवादी केन्द्रले मधेसी मोर्चासंग संयोजन गरेर संविधान कार्यान्वयनमा सहमति पूर्ण निष्कर्ष निकाल्नुपर्नेमा जोड दिए।
मन्त्री केसीले लोकतन्त्र र संसदीय मान्यता स्वकार्नेहरुले संसंदीय प्रक्रियाको विरोध गर्न नहुने तर्क गरे। संविधान समय र आवश्यकताअनुसार संशोधनीय दस्तावेज भएको उल्लेख गर्दै उनले संविधान संशोधन विधेयकलाई प्रस्तुत नै गर्न दिन्न भन्नु अराजक र असंसदीय प्रवृति भएको टिप्पणी गरे।
मन्त्री केसीले सर्वोच्च अदालतको फैसलाले पनि संविधान संशोधन विधेयकमा संसदमा छलफल हुन पाउनुपर्छ भन्ने प्रमाणित गरेको भन्दै अब प्रक्रियामा गएर भएपनि राजनीतिक गतिरोधको अन्त्य गर्नुपर्नेमा जोड दिए।