नेकपा एमालेका नेता माधवकुमार नेपालले संविधान संशोधन विधेयक फिर्ता लिन या थाती राखेर अघि बढ्न सरकारलाई सुझाव दिएका छन्।
प्रेस चौतारी नेपालले आयोजना गरेको अन्तरसंवाद कार्यक्रममा बोल्दै नेता नेपालले सर्वोच्च अदालतको फैशलालाई सम्मान गर्दे सरकारले विधेयकलाई फिर्ता लिनुपर्ने बताए। प्रदेशको सीमा हेरफेरको अधिकार प्रदेशसभालाई मात्रै भएको भन्ने आदेश अदालतले दिएको भन्दै नेपालले सरकारले तत्काल निर्वाचनको मिति घोषणा गर्नुपर्ने बताए। सरकारले संशोधन विधेयकलाई फिर्ता नलिए या थाती नराखे एमाले के गर्छ भन्ने बिषयमा भने उनले केही बताउन चाहेनन्।
‘सरकारले हाम्रो मागलाई कसरी लिन्छ?’उनले भने,‘सरकारको कदम अनुसार बिपक्षी मोर्चाले आफ्नो निर्णय गर्छ। ’ देशमा अराजकता बढेको भन्दै नेपालले देश टुक्र्याउने, बिखण्डन गर्ने र नेपालको राष्ट्रियतालाई होच्याउने काम गर्नेलाई समेत कुनै कारबाही नगरिएको बताए।
‘संविधान संशोधनको प्रस्ताव सरकारले फिर्ता लिन्छ भन्ने हाम्रो अपेक्षा छ,’उनले भने,‘पाँच नम्बर प्रदेशका जनताको भावना नबुझेमा माओवादी र कांग्रेस त्यस क्षेत्रबाट पत्तासाफ हुनेछन्। ’प्रधानमन्त्री दाहालले पटकपटक गल्ती गरेको भएपनि त्यसमा कांग्रेस सभापति शेरबहादुर देउवा चुप लागेका उनले आरोप लगाए। प्रधानमन्त्री पुष्पकमल दाहाल अपरिपक्व भएको भन्दै नेपालले परिपक्व भएका कांग्रेस सभापति शेरबहादुर देउवाले दाहाललाई नियन्त्रण गर्नुपर्ने धारणा राखे।
नेकपा एमाले मधेश बिरोधी नरहेको र मधेशमा एमालेको बर्चश्व कायमै रहेको उनले दावी गरे। ‘म पनि मधेशको पुत्र हुँ। बाहिर जन्मिएर आएको व्यक्ति मधेशी हुने, म नहुने,’उनले भने,‘जसका बाउबाजे मधेशमा जन्मिए हुर्किए, उसको बोली मधेसीका आवाज नहुने? जसको बाउबाजेको अत्तोपत्तो छैन उसको बोली मधेसीको हुने?’
तराई टुक्र्याउने योजनाअन्तरगत पाँच नम्बर प्रदेशलाई टुक्र्याउने काम गर्न लागिएको बताउँदै सरकारले संविधान संशोधनको बेमौसमी बजा बजाएर निर्वाचनलाई पछाडि धकेल्न खोजेको उनले आरोप लगाए।
पुस २२ को बिरोध सभा बृहत हुन्छः एमाले उपाध्यक्ष
एमाले उपाध्यक्ष अष्टलक्ष्मी शाक्यले पुस २२ गते प्रमुख प्रतिपक्षी एमाले लगायतका नौ दलले गर्ने बिरोध सभा भव्य ढंगले सम्पन्न हुने दावी गरेकी छन्। बिरोध सभाका लागि पुस २१ गते दसौं हजारको संख्यामा मोटरसाइकल ¥याली निकालिने उनले बताइन्। बिरोध सभामा आउन जनता आतुर रहेको शाक्यले दावी गरिन्।