काठमाडौंलाई लोडसेडिङ मुक्त गरेपछि पोहोर गरिएको अनुमानभन्दा झण्डै तीन सय मेगावाट कम बिजुली माग भएको छ। गत साल नेपाल विद्युत प्राधिकरणले पुस दोस्रो साता १५६० मेगावाट बिजुली माग हुने पूर्वानुमान गरेको थियो। तर यो वर्ष पुस २० सम्म माग १२७५ मेगावाट मात्र रहेको छ।
प्राधिकरणले माग–फागुनमा माग बढेर १३२५ मेगावाटसम्म पुग्ने अनुमान गरेको छ। ‘यो वर्ष मंसिर पहिलो साता र पुस तेस्रो साताको मागको अवस्था उस्तै छ,’ प्राधिकरणका प्रवक्ता प्रवल अधिकारीले भने, ‘मंसिर १ गते १२७६ बिजुली माग थियो भने पुस २० गते माग १२७५ मेगावाट छ।’
१२७५ मेगावाट मागमध्ये भारतबाट आयात गरिएको ३१५ मेगावाट र नेपाल भित्रको ५५० मेगावाट बिजुली प्राधिकरणले वितरण गर्छ। अहिले राष्ट्रिय प्रसारण लाइनमा ४१० मेगावाट बिजुली अपुग छ। त्यही अपुग बिजुली व्यवस्थापन गर्न प्राधिकरणले देशका अन्य भागमा दैनिक २÷३ घन्टा लोडसेडिङ गर्दै आएको छ।
‘उपत्यकामा लोडसेडिङ नहुँदा इन्भरर्टर चार्जमा चाहिने १०० मेगावाट र चुहावट नियन्त्रण गरेपछि ५० मेगावाट जति माग घटेको हो’, अधिकारीले भने, ‘उपभोक्ताले पिक आवरमा बढी बिजुली तान्ने सामान प्रयोग नगरेर पनि सहयोग गर्नुभएको छ।’
अब नदीमा पानीको बहाव घट्दै गएकाले प्राधिकरणले बिहानको समयमा माग धान्न उद्योगहरुको बिजुली कटौती गर्ने तयारी गरेको छ। अधिकारीका अनुसार बिहान ६ बजेदेखि साढे आठबजेसम्म उपत्यका बाहिर माग व्यवस्थापन गर्न उद्योगहरुमा बिजुली कटौतीको तयारी भइरहेको बताए।
‘केही दिनअघि मन्त्रीज्यूले पनि उद्योगीहरुसँग छलफल गरेर सहयोगका लागि आग्रह गर्नुभएको छ’, अधिकारीले भने, ‘उद्योगीहरु यो प्रस्तावमा सकारात्मक नै छन्।’
प्राधिकरणले अहिले काठमाडौं र पोखरा आसपासका जिल्लालाई लोडसेडिङ मुक्त बनाएको छ भने देशका अन्य ठाउँमा पनि दैनिक २÷३ घन्टा मात्रै बिजुली कटौती हुन्छ।
अधिकारीले पानीको सतह दिनदिनै घटिरहेकाले बिहान उद्योगको बिजुली कटौती गर्नुपर्ने बताए। कुलमान घिसिङ प्राधिकरणको प्रमुख कार्यकारी अधिकृत बनेपछि प्राधिकरण साँझको पिक आवरमा उद्योगलाई दिइने बिजुली कटौती गरेको थियो।