काठमाडौंमा आजदेखि २३ औं इन्टरनेसनल क्रिमिनल पुलिस अर्गनाइजेसन इन्टरपोलको एसियन रिजनल कन्फरेन्स सुरु भएको छ। हायात होटलमा सुरु सम्मेलनको प्रधानमन्त्री पुष्पकमल दाहाल प्रचण्डले उद्घाटन गरे। नेपालमा सुरु सम्मेलनले एसियाका समस्या समाधान गरी निराकरण गर्नका लागि ठोस नीति बनाउनु पर्ने भन्दै उनले शुभकामना दिए।
पछिल्लो समय प्रविधिमा आधारित अपराध मौलाएको भन्दै प्रधानमन्त्री दाहाले त्यसलाई नियन्त्रण गर्न ठोस नीतिको आवश्यकता रहेको बताए। इन्टरपोलका अध्यक्ष मिङ हुङवाइले संगठित अपराध बढ्दै गएको बताए। उनले विभिन्न देशमा उपराध नियन्त्रणका लागि खेलेका भूमिका र अनुभवहरु साटासाट गर्न सम्मेलनको आयोजना गरिएको बताए।
नेपाल प्रहरी महानिरीक्षक उपेन्द्रकान्त अर्यालले इन्टरपोलमा आबद्ध एसियन देशहरुबीचको सहकार्य अझै मजबुद बनाउन सम्मेलन आयोजना भएको बताए। साथै उनले सम्मेलनमा नेपालले मानव तस्कर र बन्यजन्तु अंग तस्करीको समस्या प्रस्तुत गर्ने जानकारी दिए।
यसका अलावा आथिर्क अपराध, साइबर क्राइम, क्षेत्रिय आतंकवादजस्ता समस्याहरुका बारेमा गहन छलफल गरिने उनले बताए। 'कतिपय देश देशका समस्या पनि छन्' उनले भने हामीले बसेर उहाँहरुसँग पनि कुरा गछौं ।
सम्मेलनमा पहिलो पटक म्याच फिक्सिङको एजेण्डामाथि छलफल हुने भएको छ। इन्टरपोलको सम्मेलनमा पहिलो पटक म्याच फिक्सिङ एजेण्डाले प्रवेश पाएको एआएजी विज्ञानराज शर्माले बताए। ग्लोवल रुपमा बढ्दै गएको म्याच फिक्सिङको एजेण्डा इन्टरपोल सम्मेलनको मुख्य एजेण्डा भएको, एआइजी शर्माले बताए।
३ दिनसम्म चल्ने सम्मेलनमा झण्डै ४० मुलुकका २ सय २० भन्दा बढी अधिकारीहरुको सहभागिता रहको छ । यसअघि नेपालमा २०४५ सालमा १० औं सम्मेलन भएको थियो। यस अघि यस्तै सम्मेलन सिंगापुरमा भएको थियो।
