दोस्रो प्रधान सेनापति राष्ट्रिय पुरुष भलिबल प्रतियोगिता आइतबारदेखि सुरु हुने भएको छ। नेपाली सेना र नेपाल इन्भेस्टमेन्ट बैंकको संयुक्त आयोजनामा हुने प्रतियोगितामा पाँच विकास क्षेत्र र तीन विभागीय टोलीको सहभागिता रहने बिहीबार आयोजित पत्रकार सम्मेलनमा जानकारी दिइयो।
माघ १४ गतेसम्म सञ्चालन हुने प्रतियोगितामा पाँच विकास क्षेत्रसँगै विभागीय टोली नेपाली सेना, सशस्त्र प्रहरी र नेपाल प्रहरीको टिमले भाग लिने छन्। लगनखेलस्थित सैनिक कभर्डहलमा सञ्चालन हुने प्रतियोगिताका विजेतालाई ३ लाख, उपविजेतालाई एक लाख ५० हजार, तेस्रो हुनेलाई ७५ हजार पुरस्कार दिइने प्रतियोगिता तथा समारोह शाखाका प्रमुख सेनानी रामकाजी राना मगरले जानकारी दिए।
उत्कृष्ट खेलाडी, प्रशिक्षक, स्पाइकर, ब्लकर, डिफेन्डर लिफ्टरलाई जनही १०/१० हजार रुपैयाँ पुरस्कार पाउने मगरले पत्रकार सम्मेलनमा बताए। त्यसैगरी प्रतियोगिताको उत्कृष्ट खेलाडीलाई एक थान मोटरसाइकल प्रदान गरिने छ। सहभागी टोलीलाई खान, बस्न र आवतजावतको सम्पूर्ण खर्च बेहोर्ने सेनानी मगरले बताए। प्रतियोगिता सञ्चालनका लागि इन्भेस्टमेन्ट बैंकले १५ लाख उपलब्ध गराउने र बाँकी सेनाले बेहोर्ने मगरले जानकारी दिए।
नेपाली सेनाकै आयोजनामा आगामी माघ २९ गते प्रधान सेनापति खुला म्याराथन प्रतियोगिता पनि हुनेछ। सेनाले क वर्गका विभिन्न बैंक र मोरङ अटो वर्क्सको सहयोगमा खुला पुरुष म्याराथन, हाफ म्याराथनलगायत अन्य दौड प्रतियोगिता आयोजना गर्न लागेको हो ।
राना मगरका अनुसार प्रतियोगितामा स्वदेशी एवं विदेशी गरी करिव ३ हजार ३ सय ३० जनाले
सहभागिता जनाउने छन्। म्याराथन सैनिक मञ्च टुँडिखेलबाट सुरु भएर शहीदगेट, त्रिपुरेश्वर, माइतीघर, बानेश्वर, कोटेश्वर, जगाती, कमलविनायक, मध्यपुर थिमी, जडिबुटी, कोटेश्वर,
तीनकुने, एयरपार्ट, चावहिल, सुकेधारा, नारायणगोपालचोक, महाराजगञ्ज, लाजिम्पाट, रानी पोखरी, शहीदगेट हुँदै सैनिक मञ्चमा पुगेर समापन हुने छ।
म्याराथन विजेताले नगद एक लाख र यामाहा मोटरसाइकल प्राप्त गर्नेछन् भने दोस्रो हुनेले ५० हजार, तेस्रोले २५ हजार, चौथो हुनेले १५, पाचौंले ७ हजार, छैटौंले ५ हजार र सातौं स्थान हासिल गर्नेले ३ हजार पुरस्कार पाउने छन्। त्यसैगरी २१ किमी हाफ म्याराथनको विजेताले २५ हजार, दोस्रो हुनेले १५ हजार र तेस्रो हुनेले १० हजार पुरस्कार पाउने छन्। यही विधाको महिलातर्फको विजेताले नगद २५ हजारका साथै स्कुटर प्राप्त गर्ने छन्। प्रतियोगिता सञ्चालनका लागि २८ लाख बजेट छुट्याइएको छ।
