राजधानी बाहिरको सर्वाधिक पुरस्कार राशीको झापा गोल्डकप भोलिदेखि सुरू हुने भएको छ। प्रतियोगिताका लागि सम्पूर्ण तयारी पूरा भइसकेको आयोजकले जानकारी दिएको छ। विर्ताबजारस्थित डोमालाल रंगशालामा माघ २५ गते सम्म हुने प्रतियोगितामा १० टिमले भाग लिनेछन्।
झापालाई फुटबल सहरको रुपमा विकास गर्न झापा गोल्डकपले वर्षेनी पुरस्कार राशी थप्दै आएको छ। गत वर्ष ६ लाख पुरस्कार राशी राखेको झापा गोल्डकपले यो वर्ष १ लाख थपेर ७ लाख पुर्याएको छ।
यो सँगै आयोजकले झापा ११ प्रतियोगिताको अन्तिम दुईमा पुगे हरेक खेलाडीलाई जनही २५ हजार र उपाधि जिते ५० हजार प्रोत्साहन स्वरूप दिने भएको छ।
‘खेलाडीलाई हौसला र प्रोत्साहान गर्न यसपालीदेखि झापा ११ का टिमलाई पुरस्कार दिने निर्णय गरेका हौ, ’ प्रतियोगिता मुल आयोजक समितिका अध्यक्ष महेन्द्र गिरीले सेतोपाटीसँग भने, ‘प्याराफिट र खेलमैदान सम्याउने र मैदानका घाँस काट्ने काम सकिएको छ। ’
डोमालाल रंगशाला यतिवेला चारैतिरबाट सिंगारिएको छ।
झापा गोल्डकपको साविकको विजेता विभागीय टोली त्रिभुवन आर्मीसहित नेपाल पुलिस र शसस्त्र प्रहरीको एपिएफले प्रतियोगितामा सहभागीता जनाउने छन्। यस्तै काठमाडौंबाट मनाङमर्स्याङ्दी, न्युरोड क्लब (एन आरटी) , हिमालयन शेर्पा, रूपन्देही-११, शुदूरपश्चिम फुटवल क्लव र भारतको शेर फुटवल क्लव सहभागी हुने आयोजक समितिले जानकारी दियो।
प्रतियोगिताको विजेताले ७ लाख नगदसहित मेडल ट्रफि र प्रमाण पत्र पाउन छन् भने उपविजेताले ३ लाख ५० हजार पाउनेछन्।
झापामा शताक्षी, सुरूङा, काकडभिट्टा, शरणामति गोल्डकप आयोजना हुँदै आएका छन्। गत वर्षदेखि शताक्षी र शरणामति गोल्डकप थपिएर झापामा आयोजना हुने गोल्डकपको संख्या ५ पुगेको हो।
१ लाख १ हजार पुरस्कार राशिदेखि ७ लाख सम्मका नगद पुरस्कारले झापा फुलबलको नयाँ हव हुँदै गएको छ।