एमाले अध्यक्ष केपी ओली प्रधानमन्त्री छँदा गरेका ४५ भाषणहरूको संगालो 'म प्रधानमन्त्री हुँदा' शुक्रबार विमोचन भएको छ।
नयाँबानेश्वरमा आयोजित विमोचन कार्यक्रममा एमाले नेता रघुवीर महासेठ, माओवादी केन्द्रका नेता विश्वभक्त दुलाल 'आहुती', पत्रकारहरू विजयकुमार र कृष्ण मुरारी ढुंगेल, राजनीतिक विश्लेषक श्रीकृष्ण अनिरूद्ध गौतम र मानवअधिकारकर्मी चरण प्रसाईं लगायतले पुस्तकबारे आफ्नो धारणा राखेका थिए।
नेकपा एमाले केन्द्रीय कार्यालयले प्रकाशन गरेको किताबको विमोचन कार्यक्रम प्रेस चौतारी नेपालले गरेको हो। पुस्तक विमोचनपछि बोल्दै पूर्वप्रधानमन्त्री ओलीले आफूलाई उखानटुक्के भन्नेहरूले यो पुस्तक पढ्नुपर्ने बताए।
उनले भने, 'मलाई उखानटुक्के भन्नेले यो पुस्तक पढ्नु, धेरै ज्ञान मिल्छ।' आफ्नो प्रधानमन्त्रीकालमा आफू राष्ट्रिय एकता, भौगोलिक अखण्डता र समृद्धीको पक्षमा उभिएको र प्रशस्तै काम गरेको दाबी उनले गरे।
उनी प्रधानमन्त्री हुँदा उनले गरेका विभिन्न भाषणहरू सामाजिक सञ्जालमा चर्चाको विषय बनेका थिए। उनले गरेका हावाबाट बिजुली निकाल्ने, एकवर्षभित्र लोडसेडिङ अन्त्य गर्ने, रेल कुदाउने र नेपाली झण्डा भएको पानीजहाज प्रशान्त महासागरमा कुदाउने जस्ता भाषणले सामाजिक सञ्जाल प्रयोगकर्ताको ध्यान खिचेका थिए। ओलीले यी भाषण हावादारी नभएर आफ्नो समृद्धी सपना भएको जिकिर गरे।
