(तस्बिर: प्रधानमन्त्रीको सचिवालय)
प्रधानमन्त्री पुष्पकमल दाहालले विद्युतीय भोटिङ मेसिनमा परिक्षण मतदान गरेका छन्।
निर्वाचन आयोगमा पुगेर प्रधानमन्त्री दाहालले मंगलबार उक्त भोटिङ मेसिन परिक्षण गरेका हुन्।
बेलायतको स्मार्टिक कम्पनीले बनाएको भोटिङ मेसिनबारे छलफल गर्न प्रधानमन्त्री दाहालसहित प्रमुख दलका नेताहरू मंगलबार आयोग पुगेका थिए।
भोटिङ मेसिनबारे स्मार्टिकका प्रमुख मार्क मालोच-ब्राउनले 'डेमो' प्रस्तुत गर्दै मेसिनले कसरी काम गर्छ भन्ने बुझाएका थिए।
डेमो हेरेपछि प्रधानमन्त्री दाहाल लगायतले परीक्षण मतदान गरेका थिए।
मतदान पछि बोल्दै प्रधानमन्त्री दाहालले नेपालले विद्युतीय भोटिङ मेसिनको प्रयोग गर्ने बताए। उनले भने, 'ढिलोचाँडो हामीले विद्युतीय प्रविधि अपनाउनै पर्छ। यसबारे विस्तृत अध्ययन गरेर मतदान प्रकृयालाई विद्युतीय प्रविधिमा लैजान हामी प्रयास गर्छौं।'
उनले स्थानीय निर्वाचन हुनेमा विश्वस्त हुन सबैलाई आग्रहसमेत गरेका थिए।
'निर्वाचन सम्बन्धि कानुन बनिसकेको छ,' उनले भने, 'अब निर्वाचन हुन्छ। यसमा विश्वस्त हुनुहोस्।'
प्रमुख निर्वाचन आयुक्त अयोधीप्रसाद यादवले निर्वाचनमा कस्तो पद्धति अपनाउने भन्ने विषय सरकार वा दलहरूले निर्णय गर्नुपर्ने बताए।
'हामी विद्युतीय प्रणाली अपनाउन पनि सक्षम छौं,' उनले भने, 'कुन प्रविधि अपनाउने भन्ने दलहरू र सरकारले निर्णय गर्नुपर्छ।'