तस्बिरः अनिश रेग्मी
व्यवस्थापिका संसदको महाअभियोग सिफारिस समितिले तत्कालीन अख्तियार प्रमुख लोकमानसिंह कार्कीमाथि लगाइएको महाअभियोगको प्रस्ताव सम्बन्धि छानबिन प्रतिवेदन संसदमा पेश गरेको छ।
समितिले तत्कालीन अख्तियार प्रमुख कार्कीमाथि लगाइएको महाअभियोगको सम्बन्धमा छानबिन गरेको प्रतिवेदन सभामुख ओनसरी घर्तीलाई बुझाएको हो। सिंहदरबारस्थित सभामुखको कार्य कक्षमा शुक्रबार अपरान्ह समितिकी सभापति कुमारी लक्ष्मी राईले सभामुख ओनसरी घर्तीलाई कार्कीमाथि लगाइएको महाअभियोगको प्रस्ताव सम्बन्धि छानबिन प्रतिवेदन बुझाइन्।
२३ पृष्ठ लामो प्रतिवेदनमा पदमुक्त भईसकेका कार्कीलाई महाअभियोग लगाइरहन नपर्ने निष्कर्ष निकालिएको छ। तर कार्कीले पदमा रहँदा गरेका गैर कानुनी कामलाई सरकारले आवश्यक अनुसन्धान गरी दण्डसजाय गर्न सक्ने किटान गरिएको छ।
कार्कीमाथि महाअभियोग लगाई रहन नपर्ने भएपनि उनले पदमा रहँदा गरेका गैरकानुनी कामलाई सरकारले आवश्यक अनुसन्धान गरी दण्डसजाय गर्न सक्ने निष्कर्ष प्रतिवेदनमा उल्लेख गरिएकोे समितिका सदस्य रामनारायण बिडारीले जानकारी दिए। उनले सर्वोच्च अदालतको आदेश अनुसार पदमुक्त भईसकेका कार्कीलाई संसदले महाअभियोग लगाईरहन नपर्ने पनि स्पष्ट पारे।
त्यस अवसरमा सभामुख घर्तीले समितिले प्रतिवेदन बुझाएकोमा धन्यवाद व्यक्त गरिन्। उनले प्रतिवेदनलाई संसदले पारित गर्ने र छिटै कार्यान्वयनमा जाने विश्वास पनि व्यक्त गरिन्।