प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहालले परिवर्तनलाई उल्टयाउन अतिवादी चलखेल भइरहेको बताएका छन्।
प्रधानमन्त्री दाहालले परिवर्तनलाई उल्टयाउने खेलमा साम्राज्यवादी शक्तिको घुसपैठ भइरहेको हुन सक्ने आशंका पनि व्यक्त गरे। तत्कालीन माओवादीले ‘जनयुद्ध’ थालेको २१ वर्ष पुरा भएको अवसरमा काठमाडौंमा आयोजित कार्यक्रमलाई सम्बोधन गर्दै प्रधानमन्त्री दाहालले सच्चा देशभक्त कम्युनिष्ट क्रान्तिकारीलाई एकताबद्ध हुन आह्वान पनि गरे। उनले एक वर्ष भित्र निर्वाचन नभए मुलुक गम्भीर दुर्घटनामा फस्ने चेतावनी समेत दिए। प्रधानमन्त्री दाहालले परिवर्तनलाई संस्थागत गर्न सबै क्रान्तिकारीहरुलाई एकता हुन आह्वान गरे।
प्रधानमन्त्री दाहालले जनयुद्धको जगमा मुलुकमा ठूलो राजनीतिक परिवर्तन भएको उल्लेख गर्दै त्यसलाई जोगाउन आजको मुख्य चुनौति रहेको पनि उल्लेख गरे। उनले मधेशको मागलाई सम्बोधन गर्न आफूले गरिरहेको प्रयासमा भाँजो हाल्न अतिवादी शक्ति लागि परेको आरोप पनि लगाए ।
प्रधानमन्त्री दाहालले जनताको बलिदानीपूर्ण संघर्षबाट प्राप्त अधिकार जोगाउन सबै पक्ष लाग्नुपर्नेमा पनि जोड दिए।