फाइल तस्बिर
संघीय लोकतान्त्रिक मधेशी मोर्चाले निर्वाचनको मिति घोषणा भएकै दिन आन्दोलनमा जाने चेतावनी दिएको छ।
सरकारले आगामी जेठ २१ गते भित्र स्थानीय तहको निर्वाचन सम्पन्न गर्ने तयारी गरिरहेका बेला मधेसी मोर्चाले आन्दोलनमा जाने चेतावनी दिएको हो।
तराई मधेश लोकतान्त्रिक पार्टीको कार्यालय बिजुली बजारमा बिहीबार बसेको मोर्चाको अनौपचारिक बैठकले संविधान संशोधन प्रस्ताव पारित नभई सरकारले निर्वाचनको मिति घोषणा गरे सोही दिनबाट आन्दोलनमा जाने निर्णय लिएको हो।
बैठकपछि संचारकर्मीसँग कुरा गर्दै संघीय सद्भावना पार्टीका अध्यक्ष अनिल झाले मधेसी मोर्चालाई पन्छाएर गरिने कुनै पनि निर्वाचन स्वकार्न नसकिने अडान दोहो¥याउनु भयो । उहाँले मोर्चाको माग सम्बोधन नगरी निर्वाचन गर्न खोज्नु भनेको सरकारले झगडाका लागि निम्तो दिनु सरह हुने टिप्पणी पनि गरे।
मोर्चाले संविधान संशोधनबिना कुनै पनि हालतमा निर्वाचनमा सहभागी नहुने बताउँदै आएको छ । संविधानसभाबाट संविधान जारी हुनुभन्दा पहिलेदेखि नै संविधानविरुद्ध आन्दोलन गरेको मोर्चाले संविधान संशोधनलाई अहिले बटमलाइन बनाएको छ ।
सरकारले व्यवस्थापिका संसदमा पेश गरेको संविधान संशोधन प्रस्ताव राष्ट्रहितमा नरहेको भन्दै प्रमुख प्रतिपक्षी नेकपा एमालेलगायतका दलले विरोध गर्दै आएका छन् । दलहरुबीच संविधान संशोधन पहिले कि निर्वाचन भन्नेमा लामो समयदेखि विवाद हुँदै आएको छ ।
मधेसी मोर्चाले प्रदेशको सीमाना, नागरिकता, भाषा, राष्ट्रियसभामा प्रतिनिधित्वलगायतका विषयमा संविधान संशोधन नभई निर्वाचनमा जान नसकिने जिकीर गर्दै आएको छ ।