युवा सङ्घ नेपालले सङ्घ र पार्टी नेतृत्वलाई पार्टीको विधान र नियमावलीबमोजिम सङ्घ सञ्चालन गर्न माग गरेको छ ।
सङ्घका उपाध्यक्ष दिलकुमारी पन्तले सङ्गठनको आन्तरिक विवादलाई न्यूनीकरण गरी एकता सुदृढ गर्न विधानानुसार सङ्घ सञ्चालन गर्नुपर्नेमा यहाँ आज आयोजित पत्रकार सम्मेलनमा जोड दिए। निर्धारित समयमा सङ्घको महाधिवेशन गर्न नसक्ने समूहलाई गुटका आधारमा सङ्घ सञ्चालन गर्न दिन नहुने बताउँदै उनले ‘नियमावली विपरीत गठित अन्तर जिल्ला कमिटी विधान विपरीत रहेकाले’ त्यसको छानबिन गर्न माग गरे।
सङ्घका सचिव नरेशकुमार शाहीले पार्टी विधानानुसार जनसङ्गठनलाई पार्टीले प्रत्यक्ष रुपमा नेतृत्व गर्ने सम्पर्क मञ्च र कमिटी गठन गर्न प्रतिबन्ध गरेका अवस्थामा सो विधान प्रतिकूल हुने क्रियाकलाप विपरीत प्रोत्साहन दिने कार्य केही गुट तथा समूहले गरेको जनाउँदै त्यसको अन्त्य गर्न पार्टी नेतृत्वलाई आग्रह गरे।
एक साताभित्र सो प्रक्रिया नसच्याएमा आगामी वैशाख ९ देखि १२ गतेसम्म चितवनको भरतपुरमा सङ्घको नवौँ राष्ट्रिय महाधिवेशन आयोजना गरिने चेतावनी दिइएको छ । सङ्घका अध्यक्ष राजीव पहारी नेतृत्वको अर्को समूहले पनि सोही समयमा मकवानपुरमा अधिवेशन गर्नका लागि तयारी सुरु गरेको छ। रासस
