नेकपा एमालेका सचिव योगेश भट्टराईले संविधान घोषणा गर्ने मुख्य राजनीतिक दलबीचको समझदारीबाट निर्वाचनका लागि अगाडि बढ्नुपर्ने आजको आवश्यकता रहेको बताएका छन्।
रफत सञ्चार क्लबमा आज आयोजना भएको साक्षात्कार कार्यक्रममा उनले संविधान निर्माण गर्ने मुख्य राजनीतिक दल निर्वाचनका लागि एक ठाउँमा उभिएर अगाडि बढ्नुपर्ने बताए।
एमाले प्रचार विभागका प्रमुखसमेत रहेका सचिव भट्टराईले देशलाई निकास दिन र संविधान कार्यान्वयनका लागि निर्वाचन अपरिहार्य भएको चर्चा गर्दै दलहबीच समझदारी बनाउन नसके र चुनावको मितिसमेत घोषणा गर्न नसके वर्तमान सरकारको औचित्य समाप्त हुने धारणा व्यक्त गरे।
“निर्वाचन गराउन नसके वर्तमान सरकारको औचित्यता समाप्त हुन्छ,” उनले भने– सबै दल मिलेर निर्वाचनको वातावरण बनाई निर्वाचनमा भाग लिनुपर्छ।
सचिव भट्टराईले “संविधान संशोधन प्राकृतिक हिसाबले मरिसकेको र प्राविधिक हिसाबले ढुकढुकी रहेको अवस्थामा व्यवस्थापिका संसद्को श्ययामा सुताइएको छ भन्दै निर्वाचनको माध्यमबाट आउँदो व्यवस्थापिका संसद्ले मात्र सो विधेयकलाई अगाडि बढाउन सकिने बताए।
एमाले नयाँ सरकार गठनको कसरतमा नलागेको बताउँदै उनले संविधान कार्यान्वयनको लागि निर्वाचनको पक्षमा एमाले रहेकाले कसैले भ्रम फैलाउँदैमा एमालेलाई केही फरक नपर्ने बताए। रासस