नेकपा (एमाले)का अध्यक्ष एवं पूर्व प्रधानमन्त्री केपी शर्मा ओलीले एमालेविरुद्ध गठबन्धन खडा गरी प्रधानमन्त्री पुष्पकमल दाहाल प्रचण्डले आन्तरिक राष्ट्रियताको वकालत गरिरहेको आरोप लगाएका छन्।
राष्ट्रियता भनेको आन्तरिक र बाह्य भन्ने हुँदैन भन्दै उनले माओवादी केन्द्रका मित्रहरुले बेलामौकामा अनेक लफ्फाजी प्रयोग गरेर जनता अल्मल्याउने काम गर्ने गरेका बताए।
नेकपा (एमाले) प्रदेश नं. ३ संगठन कमिटीको आयोजनामा आइतवार एमाले केन्द्रीय कार्यालय, धुम्वाराहीमा भएको जेष्ठ कम्युनिष्ट मञ्चमा सम्बोधन गर्दै एमाले अध्यक्ष ओलीले उक्त कुरा बताएका हुन्।
‘राष्ट्रियतालाई जोगाउन र बढाउन आजको आवश्यकता भनेको राष्ट्रिय एकता नै हो,’ ओलीले भने, ‘आधुनिक समयमा हाम्रो पारवहन अधिकारलाई उपयोग गर्नसक्नुपर्छ, नेपाल भूपरिबेष्ठित भन्नुको कुनै अर्थ छैन। कृषिको आधुनिकीकरण र कृषिमा आधारित उद्योगको विकासबाट देश कायापलट हुनसक्छ।’