काभ्रेपलाञ्चोकमा भूकम्पका कारण क्षति नव्यहोरेका व्यक्तिले पनि सरकारले उपलब्ध गराएको अनुदानलगायतका सुविधा उपभोग गरेका मौखिक उजुरी परेको छ।
जिल्लाभरबाट त्यस्ता उजुरी आए पनि सबैभन्दा बढी पाँचखाल क्षेत्रबाट करिब एक सयको हाराहारीमा उजुरी आएको राष्ट्रिय पुनःनिर्माण प्राधिकरण जिल्ला समन्वय समितिका सदस्य सचिव ध्रुव गैंडाले बताए।
“हामीलाई सहरमा बस्ने र घर नभत्केकाले पनि सुविधा लिएको सूचना आइरहेको छ” उनले भने, “ पीडित नभएकाले पनि सुविधा उपभोग गरे कानुनअनुसार असुल उपर गरिने भएकाले त्यस्ता व्यक्ति विरुद्ध बेनामे लिखित उजुरी दिन भूकम्पपीडितलाई आग्रह गरिएको थियो। ”
बस्नयोग्य घर भएका, साविककै स्थानमा घर भएका र अन्य ठाउँमा पनि घर भएकाले भूकम्पपीडितको नाममा सुविधा उपभोग गरेको उजुरी छन् ।
सो समितिको केही दिनअघि बसेको बैठकले पनि भूकम्पपीडितको नाममा पीडित नभएकाले उपभोग गरेको सुविधा अविलम्ब फिर्ता गर्न सूचना जारी गरेको थियो ।
यस्तै काभ्रेपलाञ्चोकमा पुनःनिर्माणमा पानीको समस्या देखिएकाले नयाँ प्रविधिमार्फत घर निर्माण गर्न भूकम्पपीडितलाई सुझाव दिइएको छ ।
बोरामा माटो राखेर घर बनाउने र अर्को पाँच प्रतिशत सिमेन्ट र ९५ प्रतिशत माटो राखेर मेसिनको सहायताले इँट्टा बनाएर पुनःनिर्माणको काम गर्न सकिने सो समितिले जनाएको छ
जिल्लाको ¥याले गाविसमा पुनःनिर्मााणको त्यस्तो अभ्यास भएकाले पानीको समस्या भएका महाभारत शृङ्खलाडाँडापारीका गाविसमा पनि त्यसरी पुनःनिर्माण गर्न सुझाव दिएको सदस्य सचिव गैंडाले बताए। रासस
