नेकपा एमालेका उपाध्यक्ष बामदेव गौतम बसेको घरमा बुधबार बिहान मधेसी मोर्चाका कार्यकर्ताले ढुंगामुढा प्रहार गरेका छन्। सरकारले स्थानीय निर्वाचन घोषणा गरेको विरोधमा बुधबार मधेस बन्द आयोजना गरेको मोर्चा कार्यकताले गौतम बसेको एमाले नेता रघुवीर महासेठको घरमा ढुंगा प्रहार गरेका हुन्।
पार्टीको कामका लागि मंगलबार जनकपुर गएका गौतम एमाले नेता रघुवीर महासेठको घरमा बास बसेका थिए।
मोर्चा कार्यकताले प्रहार गरेको ढुंगा लागि महासेठका घरका तीन वटा झ्यालका सिसा फुटेको धनुषा प्रहरीका डिएसपी मनोजकुमार यादवले जानकारी दिए। 'बिहान १० बजेतिर एक्कासी मोर्चा कार्यकर्ता आएर ढुंगा प्रहार गर्न थालेपछि प्रहरीले उनीहरुलाई तितरबितर पारेको थियो', यादवले भने, 'समयमै प्रहरी पुगेपछि कुनै अप्रिय घटना हुन पाएन।'
गौतमलाई पछि प्रहरीले स्कर्टिङ गरेर विमानस्थलसम्म पुर्याएको थियो।
यसैबीच मोर्चा कार्यकर्ताले रेडियो जनकपुरका सञ्चालक शितल शाहमाथि पनि आक्रमण गरेका छन्। धनुषा क्षेत्र नम्बर ५का एमाले अध्यक्ष समेत रहेका शाहलाई महासेठको घरबाट फर्कने क्रममा मोर्चा कार्यकर्ताले आक्रमण गरेको थिए। टाउको चोट लागेको शाह जनकपुर अञ्चल अस्पतालमा उपचार गरेर घर फर्किएका छन्।
एमालेले मेची-महाकाली अभियान अन्तर्गत जनकपुरमा कार्यक्रम राखेको छ।