सरकारले स्वार्थ बाझिने गरी वैदेशिक रोजगार व्यवसायमा संलग्न दुई व्यक्तिलाई खाडी मुलुकमा राजदूत सिफारिस गरेको छ।
हिजो मन्त्रिपरिषदले राजनीतिक भागबण्डाका आधारमा गरेका १४ प्रस्तावित राजदूतमध्ये युएईका लागि प्रस्तावित आशा लामा र ओमनका लागि प्रस्तावित शर्मिला पराजुली म्यानपावर व्यवसायमा संलग्न छन्।
पराजुली फोरम लोकतान्त्रिकका तर्फबाट र लामा नेपाली कांग्रेसका तर्फबाट राजदूत सिफारिसमा परेका हुन्।
लामा ‘जब ट्रयाक रिक्रुटिङ प्राइभेट लिमिटेड’ संचालक हुन् र विगत एक दशकदेखि उनी राजदूतमा सिफारिस परेको मुलुक युएई लगायतका अन्य खाडीमुलुकमा नेपाली कामदार पठाउँदै आएकी छन्।
यस सम्बन्धमा लामासँग आज दिउँसो कुरा गर्न खोज्दा आफू ब्यस्त रहेको र केही समयपछि कुरा गर्ने बताइन्l तर पछि उनको फोन स्विच अफ रह्यो।
वैदेशिक रोजगार व्यवसाय संघमा एमाले पार्टी तर्फबाट चुनाव लडेको र विगतमा कुटनीति सम्वन्धी अनुभव पनि नभएको व्यक्तिलाई अपारदर्शी ढंगले राजदूतमा सिफारिस गरेको भन्दै नेपाली काँग्रेसका नेताहरु आक्रोशित भएका छन्।
पार्टी नेता शेखर कोइरालाले लामालाई राजदूतमा किन नियुक्ति गरियो भन्ने बुझ्न नसकेको बताउँदै फेसबुकमा यसरी आक्रोश पोखेका छन्- बैदेशिक रोजगार व्यवसायी संघको निर्बाचनमा एमालेको कोटाबाट चुनाव जितेकी व्यक्ति कहिले काँग्रेस भईन्? म्यानपावर संचालन गरेर बसेको व्यक्तिलाई राजदूत जस्तो सम्मानित पदमा नियुक्ति गरेर पठाउँदा यसले कस्तो सन्देश जान्छ?’
खाडीमुलुक ओमानका लागि राजदूत नियुक्त पराजुलीलाई ओली सरकारले पनि ओमनका लागि नै राजदूत बनाउन खोजेको थियो।
उनी पनि म्यानपावर कम्पनीसँग सम्बन्धित छन्। उनका श्रीमान् फ्लोरिड रिसोर्स सोलुसनका सञ्चालक हुन् भने जेठाजू कमल ढकाल सोही म्यानपावरमा आबद्ध छन्।
‘श्रीमान्, जेठाजु, अंकल कोही व्यवसायी छन् तर म आबद्ध छैन,’ उनको भनाइ छ, ‘मेरा आफन्त व्यवसायी छन् भनेर मलाई त्यसमा जोड्न मिल्दैन।’
आफू ‘कन्सलटेन्ट’ मात्र भएको उनको भनाई छ।
खाडीका विभिन्न कम्पनीलाई कामदार आपूर्ति गर्ने बिएसडी ह्युमन रिसोर्स सोलुसन, रोयल डाइमन्ड रिक्रुटमेन्ट समेतमा पराजुलीको परिवार संलग्न छ। रोयलले युएईलगायत खाडीका अन्य मुलुकमा कामदार आपूर्ति गर्ने गरेको छ। वैदेशिक रोजगारमा जाने नेपालीहरू धेरैजसोको गुनासो 'म्यानपावर कम्पनीबाट पीडित भएँ' भन्ने छ।
कुटनीतिको अनुभव पनि नभएको र पार्टीमा संलग्न पनि नभएकी पराजुलीलाई किन सिफारिस गरियो भनेर फोरम लोकतान्त्रिकमा पनि पार्टी नेता जितेन्द्र देवले प्रश्न उठाएका थिएl