आफ्नो प्रशिक्षकलाई बर्खास्त गरेको तीन दिनभित्र लेस्टर सिटीले लिगको पाँचौ स्थानमा रहेको लिभरपुललाई ३–१ ले पराजित गरेको छ। सोमबार रातीको यो नतिजापछि लेस्टर रेलिगेशन जोनबाट निकै माथि उठेको छ।
च्याम्पियन्स लिगको पहिलो लेगको खेलमा सेभियासँग २–१ ले पराजित भएपछि लेस्टरले ९ महिनाअघि आफ्नो क्लबलाई इङ्लिस प्रिमियर लिगको ऐतिहासिक उपाधि दिलाएको प्रशिक्षक क्लाउडियो रेनेरीलाई बर्खास्त गरेको थियो।
उनको स्थानमा कार्यवहाक प्रशिक्षक क्रेग सेक्सपियरले खेल खेलाएका थिए। जसमा जामी भर्डीको २ तथा डानी ड्रिकवाटरको एक गोलको सहयोगले लेस्टरले लिभरपुललाई पराजित गर्यो। लिभरपुलसँग खेल्नुअघि लेस्टर प्रिमियर लिगको १७ औं स्थानमा थियो र रेलिगेशन जोनभन्दा एक स्थान मात्र माथि। तर, लिभरपुललाई पराजित गरेपछि १५ स्थानमा उक्लिएको छ।
फक्सेसका लागि भर्डीले २८ र ६० मिनेटमा गोल गरे। ड्रिकवाटरले ३९ मिनेटमा गोल गरेका थिए। लेस्टरले पहिलो हाफमै २ गोल गरिसकेको थियो। लिभरपुलका लागि काउटिन्होले ६८ मिनेटमा सान्तोना गोल फर्काएका थिए।
कार्यवहाक प्रशिक्षक सेक्सपियरले गत वर्ष लिग जित्दा खेलाएको ४–४–२ कै फर्मेसनमा खेलाडी मैदान उतारेका थिए। जुन असरदार देखियो।
