प्रजातन्त्रवादी प्राध्यापक सङ्घको चौथो महाधिवेशन भोलिदेखि काठमाडौँमा सुरु हुने भएको छ।
नेपाली काँग्रेसको शुभेच्छुक संस्थाका रुपमा रहेको प्रजातन्त्रवादी प्राध्यापक सङ्घको चौथो महाधिवेशन भोलिदेखि कीर्तिपुरमा सुरु हुने भएको हो।
प्रतिनिधि विवादका कारण दुईपटकसम्म स्थगित भएको महाधिवेशन प्रतिनिधि मिलाएर भोलिदेखि गर्न लागेको सङ्घका महासचिव जगत तिमल्सेनाले जानकारी दिए। महाधिवेशनमा आठ सय ३७ क्याम्पसका करिब एक हजार तीन सय प्रतिनिधिको सहभागीता रहने उनले बताए।
विसं २०६३ मा स्थापना भएको सङ्घले हालसम्म तीनवटा महाधिवेशन सम्पन्न गरिसकेको छ । सङ्घले पार्टीलाई आवश्यक परेको सुझाव र सल्लाहसमेत दिँदै आएको छ । महाधिवेशनमा अध्यक्ष, उपाध्यक्ष, महासचिवलगायत ३१ पदमा निर्वाचन हुनेछ ।
महाधिवेशनको उद्घाटन नेपाली काँग्रेसका पार्टी सभापति एवम् पूर्वप्रधानमन्त्री शेरबहादुर देउवाले गर्ने कार्यक्रम रहेको महासचिव तिमल्सेनाले बताए। रासस