कोलकोता हाज्रास्थित दुई सांस्कृतिक संस्थाले नेपालका महावाणिज्यदूत एकनारायण अर्याललाई ‘बङ्ग सङ्गीत रत्न सम्मान’ प्रदान गरेका छन्। इन्डियन फोटो एन्ड कल्चरल लभर वेलफेयर फाउन्डेसन र रिपोर्टर एन्ड फोटोग्राफर एसोसिएसनले कोलकाता र नेपालबीच जनस्तरमा सांस्कृतिक विकास र प्रवद्र्धनमा योगदान दिएबापत महावाणिज्यदूत अर्याल, त्यहाँका राष्ट्रिय शिक्षक वृजमोहन मजुमदारलगायत २० जनालाई अन्तर्राष्ट्रिय मातृभाषा दिवसका अवसरमा सम्मान गरिएको कार्यक्रमका कल्चरल सेक्रेटरी दिलीप थापाले जानकारी दिए।
सम्मानित हुनेमा गैरसरकारी संस्था शिशु भारती तथा आयोजक टोलीका सदस्य अमिताभ चक्रवर्ती, अधिवक्ता विजय सेठ, प्रदीप बोराल, डोली सेठ, हेयर डिजाइनर रवीन दास, ‘भारत एक नजर’का सम्पादक मनोज पाण्डे, ‘राजस्थान’ पत्रिकाका सम्पादक राजीव हर्षलगायत थिए । सो अवसरमा बङ्गाली गीत र नृत्य प्रस्तुत गरिएको थियो ।
यसैबीच दिलीप थापा डान्स स्कुल कोलकाता, हाउडाले आगामी चैत २७ गते बृहत् नृत्य कार्यक्रम पनि गर्दैछ । दृष्टिविहीनहरुले समेत कार्यक्रममा हार्मोनियम, तबला, गितारका साथ भजन र अन्य गीत प्रस्तुत गर्ने र तिनलाई आर्थिक सहयोग दिइने डान्स स्कुलका नृत्यनिर्देशक थापाले बताए।
नेपालको ललितपुरका दिलीप थापा भरत नाट्यम, कत्थक कली, रवीन्द्र नृत्य, डाँगियाका साथै पन्जाबको भाँगडा, गुजरातको गर्वा डाँडिया, आसामको बिहु, मणिपुरको मणिपुरी, बङ्गालको बङ्गाली नृत्य र पश्चिमका साल्सा, डिस्को र ब्रेक डान्समा पारङ्गत हुन्। रासस
