तीन साताअघि फ्रेन्च क्लब पेरिस सेन्ट जर्मनी(पिएसजी) को हातबाट भोगेको ४–० को पराजयपछि बार्सिलोना च्याम्पियन्स लिगको नकआउट चरणको निर्णायक खेलका लागि बुधबार राती (नेपाली समयअनुसार विहिबार बिहान साढे एक बजे) उत्रिँदै छ।
र, आफ्नो घरेलु मैदान क्याम्प नोउमा हुने अन्तिम १६ को दोस्रो लेगमा बार्सिलोनालाई चमत्कारी खेलको आशा छ।
पेरिसको दुःखान्त खेलपछि भाग्यवादी चिन्तनमा रहेको बार्सिलोना हालै मात्र ला लिगाको शीर्षस्थानमा उक्लिएको छ। त्यसैले क्याटलान क्लब घरेलु मैदानमा हुने दोस्रो लेगको खेलका लागि केही हदसम्म आत्मविश्वासी पनि देखिन्छ।
गत साता मात्र क्लब प्रशिक्षक लुइस एनरिकले आउँदो सिजनदेखि बार्सिलोनाको प्रशिक्षणबाट बिदा लिने घोषणा गरेका थिए। यद्यपी उनको निर्णयका बाबजुद बार्सिलोनाको खेल नकरात्मक देखिएको छैन्।
अझ, लिओनल मेसीको प्रभावशाली प्रदर्शनका कारण सिजनकै उत्कृष्ट खेल पस्किदै बार्सिलोनाले गत शनिबार आफ्नो घरेलु मैदानमा सेल्टा भिगोलाई ५–० ले पराजित गरेको थियो।
‘हामी चमत्कार हुनेमा आशावादी छौं,’ मिडफिल्डर इभान राकिटिक भन्छन्।
च्याम्पियन्स लिगको नकआउट चरणमा अहिलेसम्म कुनै यस्तो टिम जन्मिएको छैन्, जसले ४–० ले पछि परेको अवस्थालाई उल्ट्याएको होस्।
‘तथ्यगत रुपमा खेलमा फर्किन निकै चुनौतीपूर्ण छ। हामी मूर्ख होइनौं,’ प्रशिक्षक एनरिकले स्विकारेका छन्।
तर, उनको आउँदो सिजन क्लब छोड्ने निर्णयका बीच बार्सिलोनामा थुप्रै पानी बगिसकेको विश्वासमा छन्, क्लबका समर्थकदेखि खेलाडीसम्म। जसका कारण पिएसजीविरूद्धको खेलमा बार्सिलोनाले आश्चर्यजनक नतिजा निकाल्नेमा धेरै जसो ढुक्क छन्।
‘मेरो सुझाव तिमीहरू (बार्सिलोना) लाई, लुइस (एनरिक) र केही खेलाडीको विषयमा जानकार भएको कारण, धेरै नबोलँ। किनभने उनीहरू फर्किन सक्छन र तिमीहरूलाई गलत सावित गर्न सक्छनँ,’ हाल इङ्लिस क्लब म्यानचेस्टर सिटीको प्रशिक्षक रहेका पेप ग्वार्डिओलाले पहिलो लेगको खेलमै आफ्नो पूर्व क्लबलाई चेताएका थिए।
त्यतिबेला धेरैले पेपको भनाईलाई त्यति ध्यान दिएका थिएनन्, न बार्सिलोनाले नै पत्याएको थियो। अहिले २१ दिनपछि बार्सिलोना यसलाई उल्ट्याउने योजनामा छ।
एनरिकले गत शुक्रबार कुरा गर्दै आफ्नो भविष्यको बारेमा उठिरहेको गाइँगुइँ समाप्त भएकोमा आनन्द व्यक्त गरेका थिए।
स्पोर्टिङ गिजोनलाई ६–१ ले पराजित गरेपछि सेल्टा भिगोसँगको रवाफिलो जितले बार्सिलोनाको टोलीमा केही राहत महसुस गरिएको छ।
‘यदी स्टार खेलाडीले आफ्नो स्वभाविक खेल प्रदर्शन गरे भने नतिजालाई मज्जाले उल्टाउन सकिन्छँ,’ आफ्नो राजीनामाको घोषणा गरेपछि एनरिकले स्पष्ट पारेका थिए।
‘यो टिमबाट सधै आशा राख्न सकिन्छँ,’ बार्सिलोनाको खेल विभाग निर्देशक रोबर्ट फर्नान्डेजको पनि भनाई छ–‘हामीले नराम्रो नतिजा भोगेका छौं तर फुटबलमा जे पनि सम्भव हुन सक्छ।’
विश्व फुटबलको वर्तमान अवस्थामा कुनै टिमले उचो सपना देख्न सक्छ भने त्यो बार्सिलोना नै हो।
अहिले क्लबमा मेसीको प्रभाव छदैँछ। नेइमारले पनि गत साता गोल गर्दै आफू लयमा आएको आभाष दिएका छन्। लुइस सुआरेजको नाममा यो सिजन पहिले नै २६ गोल दर्ता छ। यसमा पनि च्याम्पियन्स लिगको पछिल्लो तीन घरेलु खेलमा बार्सिलोनाले प्रभावशाली नतिजा निकालेको छ।
यस सिजन च्याम्पियन्स लिगको घरेलु खेलमा बार्सिलोनाले सेल्टिकलाई ७–०, म्यानचेस्टर सिटीलाई ४–० बोरुसिया मोन्चेङग्लाडलाई ४–० गरी कूल १५–० गोलको नतिजा निकालेको छ।
गत सिजन रियल म्याड्रिडलाई उसैको घर सान्टियागो बेर्नाबेउमा ४–० ले पराजित गर्न सुआरेजले आक्रामक प्रदर्शन गरेका थिए। त्यतिबेला चोटका कारण भर्खरै खेलमा फर्किएका मेसीले दोस्रो हाफको आधा खेल मात्र खेलेका थिए।
रियल म्याड्रिड जस्तो बलियो टोलीलाई उसैको घरमा ४–० ले हराउने क्षमता राख्ने बार्सिलोनाका लागि पिएसजीसँगको खेलबाट आशा राख्नु नाजायज पनि होइन्।
‘हामी बेर्नाबेउमा म्याड्रिडलाई ४ गोल ठोक्न सक्छौं भने पिएसजीलाई क्याम्प नोउमा किन ४ गोल गर्न नसक्नु,’ उरुग्वेका स्ट्राइकरले स्पेनिस रेडियो ओन्डा केरोलाई अन्तर्वार्ता दिने क्रममा भनेका छन्–‘हामीले सुरुमा दुई गोल गर्यौ भने उनीहरूमा दबाब उत्पन्न हुनेछ। त्यसपछि हामी खेललाई आफू अनुकुल ढाल्न सक्षम हुनेछौं।’