प्रहरीले उपत्यकाका १ सय ६१ जना गुन्डाहरुको ३ पुस्ते संकलन गरेको छ। उपत्यकामा गुन्डाहरुको निगरानी राख्न सजिलो होस भन्ने हेतुले उनीहरुको ३ पुस्ते अपग्रेड गरिएको काठमाडौं प्रहरीका एसएसपी छबिलाल जोशी बन्जाडेले जानकारी दिए।
महानगरीय अपराध महाशाखासँग समन्वय गरेर उनीहरुको ३ पुस्ते संकलन गरिएको एसएसपी जोशीले बताए। गुन्डाहरुको अभिलेख पुरानो रहेछ, त्यसलाई अपग्रेड गर्नु पर्ने आवश्यकता देखेपछि ३ पुस्तेलाई व्यवस्थित बनाइएको एसएसपी जोशीले बताए।
एक महिनाको अवधिमा प्रहरीले उपत्यकाका ३० जना गुन्डाहरुलाई पक्राउ गरेको उनले पत्रकार सम्मेलन गरेर जानकारी दिए। '३ पुस्ते संकलनसँगै उनीहरु प्रहरी निगरानीमा छन्,' एसएसपी जोशीले भने, 'उनीहरुलाई अपराधिक गतिविधिमा नलाग्नसमेत चेतावनी दिएका छौं। '
पत्रकार सम्मेलनमा महानगरीय अपराध महाशाखाका एसएसपी दिनेश अमात्यले अपराध र अपराधि विरुद्ध महाशाखा र काठमाडौं प्रहरी परिसर आक्रामक रुपमा लागेको प्रष्ट पारे।
'नयाँ गुन्डाको जन्म र उनीहरु सलवलाउन थालेका छन्' उनले भने, 'हामी को कहाँ के गर्दैछ पुरै निगरानी गरिरहेका छौं।'
राजधानीमा १ महिनामा २ वटा अपरहण भएको छ। बौद्धबाट ३ जना अपहरण परेकालाई महाशाखाले २४ घन्टा नबित्दै स्वयम्भुवाट मुक्त गरेको थियो भने अपहरणकारीलाई गोली हानेको थियो।
त्यस्तै ब्यापारी श्यामसुन्दर अग्रवाल आफ्नै घरमा काम गर्ने युवतीबाट अपहरणमा परेका थिए। न्युरोडको बैंकबाट रकम निकालेर फर्कदा काकाभतिजासँग रहेको ६ लाख पनि लुटिएको थियो। लुटेराहरुलाई प्रहरीले पत्रकार सम्मेलन गरेर सार्वजनिक गरेको थियो।