गृह मन्त्रालयले कञ्चनपुरको पुनर्वासमा भारतीय प्रहरीले चलाएको गोली लागेर निर्दोष नेपालीको ज्यान गएको घटना दुःखद र निन्दनीय भएको बताएको छ। बिहीबार साँझ विज्ञप्ति जारी गर्दै मन्त्रालयले दुई देशका स्थानीय अधिकारीबीच फागुन १० गतेको सहमति अनुसार कच्ची कल्भर्ट निर्माण गरिएको र फागुन २५ मा भारतीय पक्षले सो कल्भर्ट भत्काएपछि स्थानीय नेपाली आक्रोशित भएको उल्लेख गरेको छ।
‘त्यसको विरोधमा स्वतःस्फूर्त भेला भएका स्थानीय र भारतीय पक्षबीच वादविवाद भइरहेको अवस्थामा एसएसबीले एक्कासी फायर गरेको गोली लागी घाइते भएका गोविन्द गौतमको धनगढी लैजाँदै गर्दा बाटैमा ज्यान मृत्यु भयो’, विज्ञप्तिमा भनिएको छ, ‘पूर्व सहमतिमा निर्मित कल्भर्ट सरोकारवालासँग कुनै छलफल, संवाद नगरी भारतीय पक्षले एकपक्षीय रुपमा भत्काएपछि त्यसको विरोधमा उत्रिएका नेपाली नागरिकलाई भारतीय सुरक्षाकर्मीले गोली प्रहार गर्दा निर्दोष नेपालीको मृत्यु भएको घटना अत्यन्त दुःखदायी र निन्दनीय छ।’
मन्त्रालयले सीमा रक्षकले आवेगमा आएर गोली प्रहार गरेको भन्दै घटनाबाट नेपाल सरकार स्तब्ध भएको बताएको छ। विज्ञप्तिमा यो समस्याको समाधानका लागि कुटनीतिक पहल गर्न सरकार प्रतिवद्ध रहेको उल्लेख गरिएको छ।
नेपाल सरकारले भारतीय प्रहरीको गोली लागेर गौतमको मृत्यु भएको बताए पनि काठमाडौंस्थित भारतीय दूतावासले घटनामा एसएसबीले गोली नचलाएको विज्ञप्ति निकालेको छ।