फ्रेन्च क्लब पेरिस सेन्ट जर्मनी (पिएसजी) क्लब च्याम्पियन्स लिगको समूह १६ को नकआउट चरणबाट बाहिरिएको अवस्थामा अर्को फ्रेन्च क्लब लियोनले भने युरोपा लिगमा उत्कृष्ट सुरुवात गरेको छ।
पिएसजी च्याम्पियन्स लिगबाट बाहिरिएको भोली पल्ट बिहिबार राती आफ्नै घरेलु मैदानमा भएको युरोपा लिगअन्तर्गत अन्तिम १६ को पहिलो लेगको खेलमा लियोनले इटालियन क्लब रोमालाई ४–२ गोलले पराजित गर्यो।
पहिलो हाफमा २–१ ले पछाडि परेको अवस्थामा घरेलु टोलीले दोस्रो हाफमा उत्कृष्ट पुनरागमन गर्दै ३ गोल फर्कायो। लियोनको जितमा कोरेन्टिन टोलिसो, नबिल फेकिर र लाकाजेट नायक सावित भए। यि तीनै जनाले दोस्रो हाफमा गोल गरेका थिए।
घरेलु टोलीले मोक्टार डियाखाबेको ८ मिनेटको गोलमा अग्रता बनाएको थियो। तर, रोमाका लागि मोहमेद सालाहले २० र फेडेरिको फाजियोले ३३ मिनेटमा गोल गर्दै भ्रमणकारी टोलीलाई पहिलो हाफमा अग्रता दिलाएका थिए।
दोस्रो हाफमा टोलिसोले ४७, फेकिरले ७४ र लाकाजेटले ९० पछि थप गरिएको अतिरिक्त समयको दुई मिनेटमा गोल गरे।
रोमाले अन्तिम आठमा प्रवेश पाउन आउँदो साता आफ्नो घरेलु मैदानमा यो नतिजा उल्टाउनु पर्नेछ।